Seçki homoseksualların da üzünü güldürüb...

Lent.az-ın “Hürriyet” qəzetinə istinadən verdiyi məlumata görə, bu seçki ABŞ-da homoseksuallar baxımından da diqqət çəkib.

Demokratların Senata namizədi, homoseksual Tammy Baldvin ilk homoseksual senator seçilib. Noyabrın 6-da Men və Merilend ştatlarında keçirilən referendumlarda eyni cinsdən olanların evliliyinin qanuniləşməsi qəbul edilib. Beləliklə, ABŞ-da ilk dəfə eyni cinsdən olanların evliliyi federal qanunlarla və yaxud məhkəmə qərarı ilə deyil, referendum yolu ilə qanuniləşmiş olub. Vaşinqtonda və Minnesota ştatlarında bununla bağlı keçirilən referendumun nəticələri hələ dəqiqləşməyib.

Noyabrın 6-da 4 ştatda isə marixuanadan tibbi məqsədlərlə istifadə etməklə bağlı qanun layihəsi referenduma çıxarılıb. Vaşinqton və Kolorado ştatlarında referendumdan “Bəli” cavabı çıxıb. Beləliklə, 21 və daha yuxarı yaşda olan insanlar bu ştatlarda tibbi məqsədlərdə istifadə etmək üçün marixuana istehsal edə, üzərilərində gəzdirə və paylaya biləcəklər. Hələ yekun nəticələr müəyyənləşməsə də, Massaçusetts ştatında da marixuana referendumundan “Bəli” cavabı çıxacağı gözlənilir. Oregon ştatında isə marixuanaya “Yox” deyiblər.