Hələbdə kürd silahlılarının lideri öldürüldü

Lent.az-ın “mignews.com” saytına istinadən verdiyi məlumata görə, Hələb şəhərində etnik qruplar arasında münasibətlər də gərginləşməkdə davam edir.

Müxalif Suriya Azadlıq Ordusunun silahlıları Nucin Dirik ləqəbli Şaxa Əli Abdanı öldürüblər. Bu qadın Hələbdə kürd silahlıların lideri olub. Suriyada PKK terror təşkilatına yaxınlığı ilə seçilən PYD-nin yaydığı məlumatda bildirilir ki, Nucin Dirik əsir götürüldükdən bir neçə həftə sonra öldürülüb.

Qeyd edə ki, Suriyanın digər bölgələrində olduğu kimi Hələbdə də kürdlər əvvəldən neytrallıqlarını qorumağa çalışıblar. Şəhərdə kürdlərin yaşadıqları məhəllələrə nə prezident Bəşər Əsədə sadiq ordu bölmələri, nə də Suriya Azadlıq Ordusunun silahlıları daxil olublar. Lakin keçən həftə Suriya Azadlıq Ordusunun 200-ə yaxın döyüşçüsü şəhərdə kürdlərin yaşadıqları yerlərdə döyüş mövqeləri tutmağa cəhd göstərib. Nəticədə kürdlərlə müxaliflər arasında döyüş baş verib. Döyüşdə 30 nəfər ölüb, müxaliflər 180 kürdü əsir götürüblər.