Çeçenistan prezidentinin müşaviri Türkiyədə 12 kq qızılla yaxalandı - FOTO

Çeçenistan prezidenti Ramazan Kadırovun müşaviri Əmruddin Edelgiriyev və dostu Həsən Həkimov Antalya Hava Limanında 12 kiloqram 376 qram qızıl külçə ilə yaxalanıb.
Lent.az-ın “Hürriyet” qəzetinə istinadən verdiyi məlumata görə, hadisə oktyabrın 17-də baş verib. Gömrüklə bəyan edilməmiş qızıl külçə Əmruddin Edelgiriyevin çantasında aşkarlanıb. Həsən Həkimov qızılın olduğu çantanın ona aid olduğunu iddia edib. O, qızılın Çeçenistana məxsus olduğunu və üzərində işlənilməsi üçün Türkiyəyə gətirdiklərini, ancaq bu iş üçün çox pul istənildiyi üçün Çeçenistana geri apardıqlarını söyləyib. H.Həkimov qızıl külçəsinin oktyabrın 7-də Əmruddin Edelgiriyevin diplomatik pasportu ilə gömrükdə yoxlanılmadan Antalya Hava Limanından Türkiyəyə keçirdiklərini bildirib.

Sorğudan sonra diplomatik toxunulmazlığı olan Əmruddin Edelgiriyev xüsusi təyyarə ilə Çeçenistana göndərilib, Həsən Həkimov isə saxlanılıb. Ertəsi gün Antalya Məhkəməsi Həsən Həkimovu sərbəst buraxıb, ancaq o, bundan sonra aparılacaq məhkəmə prosesinə gəlməlidir. Türkiyəyə qaçaqmalçılıqla gətirilən qızıl külçəsi isə Türkiyə Mərkəzi Bankına təhvil verilib. Baş prokuror Ali Çam isə qısa müddətdə Əmruddin Edelgiriyev və dostunun barəsində ittiham aktı hazırlayıb. İttiham aktında hər iki şəxsin 1 ildən 5 ilə qədər azadlıqdan məhrum edilməsi, o cümlədən cərimələnməsi istənilir. Yaxın günlərdə məhkəmə prosesi keçiriləcək.