Lukaşenko homoseksual və lesbiyanlar haqqında danışdı

Belarus prezidenti Aleksandr Lukaşenko “İndependent” qəzetinə müsahibəsində homoseksualizm və eyni cinsdən olanların evlənməsinə münasibətini açıqlayıb.

Lent.az-ın “İndependent” qəzetinə istinadən verdiyi məlumata görə, Aleksandr Lukaşenko lesbiyanlara ürəyi yandığını və onların ortaya çıxmasının kişilərin günahı olduğunu söyləyib.

O bildirib ki, məhz kişilərin günahından qadınlar bu gün kişini qadınla əvəzləyiblər: “Bu, bizim günahımızdır, bəzi qadınlar üçün kişi durumunda olmamışıq. Həmin qadınlar da biz kişilərdə tapmadıqlarını qadınlarda axtarmağa başlayıblar. Ona görə də mən lesbiyanları mühakimə etmirəm”.

Belarus prezidenti homoseksualist kişilərlə bağlı isə heç vaxt müzakirə aparmağa təşəbbüs göstərmədiyini dilə gətirib: “Çünki bu, mənim anlayışımdan kənardır. Mən bunu anormallıq sayıram”.

Aleksandr Lukaşenkonun seksual azlıqlara qarşı əsas iradı isə onların uşaqlarının olmaması ilə bağlıdır: “Əgər meyar normaldırsa, nə üçün onların uşaqları yoxdur?”