ABŞ-da hinduların hüquqlarının müdafiəçisi öldü

Hinduların müstəqilliyi uğrunda mübarizə, hüquq müdafiəçisi Rassel Mins 72 yaşında ölüb.

Lent.az-ın «RİA-Novosti»-yə istinadən məlumatına görə, o, Şimali Dakotda, rezervasiyada yaşadığı evdə dünyasını dəyişməzdən iki gün öncə tərəfdarlarına «Lakot hindularının, bütün yerli xalqların və bütün insanların azadlığı, müstəqilliyi uğrunda mübarizə»yə çağırıb.

Rassel Mins Şimali Dakotda Lakot icmasının Oqlal tayfasında anadan olub. 1969-cu ildə Amerika Hinduları Hərəkatında ictimai fəaliyyətə başlayıb.
Qısa bir zamanda onun başçısı olub. 1973-cü ildə bu qurumun fəalları bir neçə qəsəbəni iki aydan artıq bir müddətə ələ keçirib, idarə etmişdi.

Bir müddət sonra Mins çoxsaylı siyasi kampaniyalara qatılıb. 1984-cü ildə O, Respublikaçılar Partiyasından prezidentliyə namizəd olmağa çalışıb. 1987-ci ildə isə Libertarian Partiyasından yenə ABŞ prezidentliyinə namizədliyi iddia edib.
2007-ci ildə o, ABŞ hakimiyyəti ilə hindu tayfaları arasında müqaviləni ləğv etdiyi haqda bəyanat verərək, müstəqil Lakot Respublikasının yarandığını bildirib.

Şimali və Cənubi Dakota ştatlarının, Nebraska və Montananın bir hissəsini, 7 tayfanın daxil olduğu Lakot hindularının yaşadığı yerlər bu respublikanın ərazisi sayılır. Lakot tayfasından olanlar 44 il yaşayır ki, bu dünyada ən aşağı göstəricidir.

Hindu ictimai fəallar ABŞ hakimiyyəti ilə müqaviləni «gərəksiz kağız parçası» adlandıraraq, onları belə anlaşmaları davamlı olaraq, pozmaqda suçlayıblar.

Lakot Respublikası geniş əks-səda doğursa da dünyanın heç bir dövləti onun müstəqilliyini tanımadı.

Siyasi və hüquq müdafiəçiliyi ilə yanaşı Rassel Mins çoxlu filmdə çəkilib. Onların arasında «Ləpirçi» (2007), «Sonuncu mogikan» (1992), «Anadangəlmə qatil» (1994) kimi filmlər var.