Gürcüstan parlamenti yeni tərkibdə ilk iclasını keçirib, sədr seçilib-FOTO

Bu gün Kutaisidə 8-ci çağırış Gürcüstan parlamentinin ilk iclası başlayıb.

APA-nın Gürcüstan parlamentinin ilk iclasında iştirak etmək üçün Kutaisiyə ezam olunan əməkdaşının məlumatına görə, parlamentin ilk iclasını Konstitusiyaya görə, Gürcüstan prezidenti Mixail Saakaşvilinin açıb.

Prezident çıxışında Kutaisidə tikilən yeni parlament binasını Gürcüstanın simvolu adlandırıb: “Biz düşmən deyilik. Biz insanlara onların nə istədiyini verməliyik. Ola bilər ki, bu gün müxalifətə keçən hakimiyyət nümayəndələri indiki hakimiyyətlə birgə çalışsınlar. Biz birgə çalışmalıyıq. Səhiyyə, işsizliyin ləğv edilməsi, avroatlantik inteqrasiya sahələrində və digər vacib məsələlərin həlli üçün bir yerdə işləməliyik.”

Sonra Gürcüstan MSK-nın sədri Zurab Xaratişvili çıxış edərək prosedura görə, həm “Gürcü arzusu”, həm də Vahid Milli Hərəkat Partiyasından seçilən deputatların siyahısı elan edib.

İlk sessiyanı parlamentin sədri seçilənə qədər “Gürcü arzusu”nun ən yaşlı üzvü İvane Kquridze aparıb.

Yeni parlamentin ilk iclasında “Gürcü arzusu”nun 85, Vahid Milli Hərəkat partiyasının 65 deputatı iştirak edib.

İclasda prezident M. Saakaşvili ilə yanaşı, bütün Gürcüstanın katolikos patriarxı II İlya, “Gürcü arzusu”nun lideri, baş nazir vəzifəsinə namizəd Bidzina İvanişvili, hazırda fəaliyyətdə olan hakimiyyət rəsmiləri, Gürcüstanda akkreditə olunan dipkorpus nümayəndələri və qonaqlar iştirak edirlər.

“Gürcü arzusu” blokunun liderlərindən biri, Respublikaçılar Partiyasının sədri David Usupaşvili qanunverici orqanın sədri seçilib. D. Usupaşvilinin lehinə 88 parlamentar səs verib.

İclasın gedişində sədrliyə namizəd kimi David Usupaşvili ilə yanaşı keçmiş parlament sədri David Bakradze, “Gürcü arzusu”ndan seçilən deputatlardan David Sağvarelidze, Koba Davitaşvili və Vahid Milli Hərəkat Partiyasından Zakariya Kurtsinaşvili çıxış ediblər.

Parlament sədrinin birinci müavini “Gürcü arzusu”ndan Manana Kobaxidze, müavin vəzifələrinə isə eyni blokdan olan Zviad Dzidquri, Zurab Abaşidze, Murman Dumbadze və Vahid Milli Hərəkat Partiyasından Giorgi Baramidze seçiliblər.

Daha sonra parlamentin fraksiya və komitə sədrləri seçilib.