Türkiyənin Suriyaya hərbi müdaxilə planı hazırdır

Türkiyə Silahlı qüvvələrinin Baş Qərargahı Suriyaya hərbi müdaxilə planını hazırlayıb.
Lent.az-ın Türkiyənin “Vatan” qəzetinə istinadən verdiyi məlumata görə, plan hazırlanarkən Suriya ordusunun imkan və qabiliyyəti, bölgədə Rusiya ilə PKK amili də nəzərə alınıb.

Hərbi müdaxilə planında İkinci Ordu Komandanlığı aktiv rol oynayacaq. Risklərin də nəzərə alındığı planda Suriyaya hərbi müdaxilə zamanı quru, hava və hərbi dəniz qüvvələrindən birgə istifadə nəzərdə tutulub. Xüsusi təyinatlı qüvvələrin də qatılacağı hücum planının sərhədlərini isə savaş zamanı hökumət müəyyənləşdirəcək.

Qeyd edək ki, məhz Suriyaya hərbi müdaxilə planının hazırlanması ilə əlaqədar Ermənistanla sərhədlə yerləşən Ağrı dağında xidmət edən təcrübəli briqada generalı Hakan Atınc Hataydakı Mexaniki Piyada Briqadanın komandanlığına gətirilib. İkinci Ordunun komandanı ordu generalı Qalib Mendidir. O, avqust ayında bu posta gətirilib. Əgər Suriyaya hərbi müdaxilə qərarı verilərsə, Qalib Mendi və Hakan Atıncın üzərinə kritik vəzifələr qoyulacaq.