Tiflisdə müxalifətin mitinqi başa çatdı – HADİSƏ YERİNDƏN -

Tiflisin mərkəzindəki Azadlıq meydanında Gürcüstanın əsas müxalifət partiyası olan “Gürcü arzusu” Partiyasının keçirdiyi mitinq başa çatıb. Lent.az-ın Tiflisdə olan müxbiri Səbuhi Məmmədlinin verdiyi məlumata görə, hazırda paytaxt Tiflisin Rustavelli prospekti, Puşkin küçəsi, eləcədə də digər mərkəzi küçə və prospektləri insanlarla doludur.

Şəhərdə nəqliyyatın hərəkəti dayandırılıb, mərkəzdə olan 6-7 metro stansiyası bağlanılıb. 4 istiqamətdən Azadlıq meydanına yürüş edən 10 minlərlə mitinq iştirakçısı Azadlıq meydanında birləşərək, hazırkı prezident Mixail Saakaşvilinin istefasını tələb ediblər.

Mitinqdə müxalifət lideri Bidizna İvanişvili çıxış edərək, Mixail Saakaşvilinin siyasətini kəskin tənqid edib. O, bildirib ki, partiyası qalib gələrsə, Gürcüstanda kiçik də olsa biznesin qurulmasına şərait yaradacaq, ölkənin inkişafına nail olacaq. Rusiyaya meylli siyasətçi adlandırılmasına baxmayaraq Bidizna İvanaşvili Gürcüstanın demokratikləşməsinə, qərbə inteqrasiyasının gücləndirməsinə nail olacağını deyib.

Mitinqə eks-prezident Eduard Şevardnadzenin qatılacağı gözlənilsə də, bu xəbərlər özünü doğrultmayıb.

Yerli jurnalistlər mitinqdə 100 minə yaxın insanın iştirak etdiyini iddia edirlər.

Səbuhi Məmmədli, Tiflis