"Qanuni oğrular" Saakaşvilini devirmək istəyirmiş

Lent.az-ın «lenta.ru»-ya istinadən məlumatına görə, həmin materiallarda 2011-ci il noyabrın 9-da Fransanın cənubunda “qanuni oğrular”ın keçirilmiş görüşünün videokadrları yer alıb. Bu görüşün Gürcüstanın keçmiş dövlət naziri, rejissor Giorgi Xaindravanın təşəbbüsü ilə keçirildiyi bildirilir.

Fransa jandarmeriyası iddia edir ki, Xaindrava və daha 5 “qanuni oğru” kriminal aləmdə tanınan Revaz Lordkipanidzenin evində bir araya gəlib. Sabiq nazir Gürcüstanda hakimiyyətin dəyişdirilməsi üçün onlardan yardım istəyib. Gürcüstan telekanallarının efirində yayılan videomateriallarda Xaindrava dedikləri əks olunub. O deyib ki, əgər 2012-ci ildə gürcü müxalifəti qalib gəlməsə, ötən əsrin 90-cı illərin ortalarında əhaliyə vahiməli anlar yaşadan “Mxedrioni” tipli silahlı dəstələr yaradılacaq. Xaindrava bu dəstələrin ölkədə terror törədəcəyini bildirib.

Qeyd edək ki, Xaindravanın özü də vaxti ilə “Mxedrioni”nin üzvü olub.

Fransa jandarmeriyasının yaydığı materiallarda qeyd olunur ki, Xaindravanın “qanuni oğrular”la görüşü zamanı Gürcüstanda hakimiyyətin devrilməsi planları razılaşdırılıb.

Onu da bildirək ki, artıq G.Xaindrava Gürcüstan prokurorluğuna çağırılıb.