12:15
11 Sentyabr 2020

Neftçalanın keçmiş icra başçısının həbs müddəti uzadıldı - YENİLƏNİB

Səbail rayon Məhkəməsində Neftçala rayon İcra Hakimiyyətinin sabiq başçısı İsmayıl Vəliyev və onunla birgə həbs olunan barəsində seçilmiş həbs qətimkan tədbirinin uzadılması ilə bağlı təqdimata baxılıb.

APA-nın məlumatına görə, prosesdə təqdimatlar təmin edilib.

Qərara əsasən, İ. Vəliyev və digərlərinin barələrində seçilən həbs qətimkan tədbiri daha 3 ay uzadılıb.

***

11.58

Neftçala rayon İcra Hakimiyyətinin sabiq başçısı İsmayıl Vəliyev və onunla birgə həbs olunan şəxslər məhkəməyə gətiriliblər.

APA-nın məlumatına görə, İ. Vəliyev və digərləri barələrində seçilmiş həbs müddətinin uzadılması ilə bağlı istintaq orqanının təqdimatına Səbail Rayon Məhkəməsində baxılır.

Proses İlkin Rüstəmlinin sədrliyi ilə keçirilir.

***

11:01

Neftçala rayon İcra Hakimiyyətinin sabiq başçısı, bir neçə ay əvvəl Dövlət Təhlükəsizlik Xidmətinin keçirdiyi əməliyyatla həbs olunan İsmayıl Vəliyev vəkilindən imtina edib.

APA-nın xəbərinə görə, sabiq icra başçısı vəkilini dəyişib. İ. Vəliyev vəkil Əyyub Ələkbərovla bağlanmış müqaviləyə xitam verib. O, artıq hüquqlarını müdafiə etmək üçün yeni vəkillə müqavilə bağlayıb.

***

09.15

Neftçala Rayon İcra Hakimiyyətinin sabiq başçısı İsmayıl Vəliyev və onunla birgə saxlanılan digər vəzifəli şəxslər barəsində seçilmiş həbs qətimkan tədbirinin uzadılması ilə bağlı təqdimat məhkəməyə daxil olub.

APA-nın məlumatına görə, İ. Vəliyev və digərləri ilə bağlı təqdimata bu gün Səbail rayon Məhkəməsində baxılacaq.

Təqdimatlar hakim İlkin Rüstəmlinin icraatındadır.

Qeyd edək ki, Dövlət Təhlükəsizliyi Xidmətinin yaydığı məlumata görə, Neftçala Rayon İcra Hakimiyyətinin vəzifəli şəxslərinin səlahiyyətlərindən qulluq mənafeyinə qəsdən zidd olaraq istifadə edib vətəndaşların hüquqlarına, cəmiyyətin və dövlətin qanunla qorunan mənafelərinə mühüm zərər vuran çoxsaylı cinayət əməllərinə yol vermələrinə dair məlumatlar əsasında kompleks araşdırma tədbirləri başlanılıb. Toplanılmış materiallarla rayon İcra Hakimiyyətinin başçısı İsmayıl Vəliyevin mütəmadi olaraq vəzifə səlahiyyətlərindən sui-istifadə edib təhsil, səhiyyə və digər yerli dövlət təsisatları rəhbərlərindən müxtəlif adlar altında şəxsən pul vəsaitləri tələb edərək almasına əsaslı şübhələr müəyyən olunub.

Həmçinin, İsmayıl Vəliyevin şəxsən, habelə icra hakimiyyəti başçısının birinci müavini Vurğun Əkbərov, Memarlıq və tikinti şöbəsinin müdiri Vüqar Nağıyev, tabeçiliyində olan digər vəzifəli şəxslər vasitəsi ilə rayon ərazisində fərdi sahibkarlıq fəaliyyəti ilə məşğul olan şəxslərdən müxtəlif adlar altında pul vəsaitləri tələb edərək almasına əsaslı şübhələr müəyyən edilib.

İsmayıl Vəliyevin, Vurğun Əkbərovun, icra başçısının müavini Gültəkin Sadıqovanın, Ərazi idarəetmə və yerli özünüidarəetmə orqanları ilə iş şöbəsinin müdiri Anar Cəfərovun xidməti otaqlarına məhkəmənin qərarı əsasında keçirilən baxış zamanı müxtəlif yerli icra hakimiyyəti və digər yerli dövlət orqanlarının vəzifəli şəxslərindən, sahibkarlıq fəaliyyəti ilə məşğul olan şəxslərdən alınmış vəsaitlərin öz əlyazmaları ilə tərtib olunmuş siyahıları, külli miqdarda pul vəsaitləri, sənədlər və iş üzrə əhəmiyyət kəsb edən digər dəlillər aşkar edilərək götürülüb.

Dİgər xəbərlər