Baş bankir inflyasiyadan danışdı

Azərbaycanda manatın tam "üzən məzənnə"yə keçid perspektivi inflyasiyanın hədəflənməsi rejiminə keçidindən asılıdır.

" APA -Economics"in məlumatına görə, bunu jurnalistlərə açıqlamasında Azərbaycan Mərkəzi Bankının (AMB) İdarə Heyətinin sədri Elman Rüstəmov deyib.

Onun sözlərinə görə, inflyasiyanın hədəflənməsi rejiminə keçid pul siyasətinin əsas lövbəri olaraq faiz dərəcələrinə, yəni pulun dəyərinin hədəflənməsinə keçmək mümkün olacaq: "Bu gün açıq demək lazımdır ki, defakto sabit məzənnə inflyasiyanın ən başlıca lövbəridir. Biz bilirik ki, bu gün əhəmiyyətli dərəcədə istehlak malları idxal edirik və onların istehlak səbətində payı olduqca yüksəkdir. Bu gün Azərbaycanda aşağı inflyasiya varsa, onun ən başlıca səbəblərindən biri məzənnə və onun gözləntilərinin sabitliyidir", - deyə E.Rüstəmov qeyd edib.