İdarələrdə dilçi ştatları açılacaq

AMEA-nın Dilçilik İnstitutunda Azərbaycanda dilçiliyin inkişafına dair dövlət proqramı hazırlanıb. Dilçilik İnstitutunun direktoru Fəxrəddin Veysəllinin Lent.az-a verdiyi məlumata görə, bu proqram bütün mərhələlərdən keçib və ölkə başçısına təqdim olunub.

F. Veysəlli bildirib ki, Azərbaycanda dövlət dilinin işlənməsində çox ciddi problemlər var: “Bu proqramı Azərbaycanda qloballaşma şəraitinə uyğun olaraq hazırlamışıq. Dövlət proqramında reklamlarda, idarələrdə telekanallarda, kütləvi informasiya vasitələrində dilin işlədilməsi ilə bağlı xüsusi bəndlər var. Prezidentin imzasından sonra əlimizdə rəsmi sənəd olacaq və biz bu sənədə söykənərək ölkə ərazisində monitorinqlərə başlayacağıq”.

F.Veysəlli onu da əlavə edib ki, bütün idarəetmə qurumlarında, icra hakimiyyətlərində dil üzrə ayrıca bir mütəxəssis, dilçi ştatı açılacaq: “Radiolarda, televiziyalarda, qəzetlərdə yüksək səviyyəli adamlara baxmayaraq yenə də səhvlər gedir. Bütün bunların hamısını nəzarətdə saxlamaq üçün müəyyən bir konseptual sənəd hazırlamaq üçün həmin o qurumlarda ştatlar, mütəxəssislər ayrılacaq və onlar bilavasitə sənədlərin, əmrlərin dilinə nəzarət edəcək”.

Direktor Bakı şəhər İcra Hakimiyyətinin nəzdində qaynar xətt açılmasının da nəzərdə tutulduğunu deyib. Azərbaycan dili haqqında qanun pozuntusu görən hə bir vətəndaş birbaşa qaynar xəttə zəng edərək məlumat verə biləcək.