Su çəninin altında yanan ocaq, şaxtadan donan kuryer – Qarlı Bakıdan REPORTAJ

Bakının qar sevinci hərədə bir cür müşayiət olunur. Sevgililərinin əllərini isitməyə bəhanə tapan gənclər, əldə bir qədəh qırmızı şərab, yanında pendirlə şəkil çəkdirib qeyd edənlər - romantiklər. Böyük bir qisim isə bu sevinci mədə-qarın müstəvisində yaşayır - səhər saat 6-da araqla sarımsaqlı, sirkəli xaş, xingal, günortaya yaxın pivə ilə davam edən doyumlu bir sevinc!

Yağan qara ən çox kimlər sevindi?

Yağan qara ən saf və səmimi sevinənlərsə uşaqlardır. Həyətdən çıxıb işə tələsirəm. Beli çantalı məktəbli uşaqlar küləyin divarların küncünə, ağacların dibinə sovurduğu qarı əllərində yumrulayıb bir-birinə atırlar.

Bəzi şitəngi uşaqlar qarı qızların üzünə vurur. Heç yerdə qardan adam görmək mümkün deyil, çünki Bakıya yağan seyrək qarı adam etmək çətin məsələdir.

Yadıma gəlir, uşaq vaxtı ən böyük istəyimiz düzəltdiyimiz qardan adama burun düzəltməyə kök tapmaq idi. Qəribədir ki, heç vaxt da kök tapılmırdı. Çınqıl, ya ağac parçası tapıb qardan adamımızı "inandırırdıq" ki, bu, sənin burnundur.

Əlcəyimiz olmayanda isə əlimizə corab geyinib oynayırdıq. Sonra da donan əllərimizi qaz peçində isidəndə sızıltısından zarıyırdıq.

Lakin siz belə nostalgiya dolu romantik söhbətlərə fikir verməyin. Bəri durun, Bakıya yağan qarın əsl üzündən danışaq - şaxta kimi adamı kəsən reallıqdan.

Suyu donduran şaxta qar sevincini yaşamağa qoymadı

Qonşumuz su çəninin altında ocaq yandırıb ki, donmuş su açılsın. Amma külək heç ocağı da düz-əməlli yanmağa qoymur. Səhərin gözü açılmamış insanlar "1001 xırdavat"lara axışır - donub qırılmış su kranlarını, borularını təmir etmək üçün. Hamı əlində qaynar çaydanla su borularının donunu açmağa çalışır.

Qonşumuz Məhəmməd kişi (məhəllədə hamı ona "Mamed" deyir) məni görən kimi özünəməxsus yüksək səslə deyir:

- Yaz da, yaz, jurnalist adamsan, yaz ki, niyə bir az qar yağan kimi hər yer donur, vərəzan günə qalırıq?

- Baş üstə - deyib dayanacağa gedirəm. Əvvəl 10 dəqiqə intervalla gələn avtobusları indi 20 dəqiqədən artıq gözləməli oluruq.

Qarlı havalarda küçə heyvanları nə edir?

Belə havalarda küçə heyvanları da çox acınacaqlı vəziyyətdə olurlar. Küçə pişikləri qızınmaq üçün girib maşınların mühərriklərində yatırlar. Səhərlər sürücülər maşını işə salanda isə mühərrikin pəri onları parça-parça edir. Yaxşı olar ki, sürücülər mühərriki işə salmazdan əvvəl orada heyvan olub-olmadığını yoxlasınlar.

Qarda ən çox əziyyət çəkənlər həm də kuryerlərdir.

Ali Məhkəmənin yaxınlığındayam. Bir kuryer velosipedini saxlayıb qar çovğununun dinməsini gözləyir. Məndən siqaretini yandırmağımı xahiş edir:

- Əslində, özümdə alışqan var, barmaqlarım donub, alışqanı tutmur ki, yandıram. Qar gözlərimi deşir, yolu görmürəm. Necə gedəcəm, bilmirəm.
- Ən yaxşısı ara küçələrlə getməkdir...
- Onda da gecikirəm də. Bayaq zülmlə aparıb yeməyi təhvil vermişəm, şikayət edib ki, yemək soyuqdur. Heç kim bizi fikirləşmir.

Kuryer siqaretini ala-yarımçıq çəkib yoluna davam etməyə çalışır. Bu qədər əziyyət çəkən insanları görəndə qarı nə qədər sevsəm də, bəzən yağmasını istəmirəm.

Nəhayət, "APA GROUP"-a çatıram. Fotoqrafımız İlkinlə qarşılaşıram.

- Uşaqlar binanın həyətində qartopu oynayır. Çıxıram onları çəkəm.
- Gözlə, mən də gəlirəm, bəlkə, reportaj yazdım.

Uşaqlar binanın həyətində qardan adam düzəldirlər

- Kaş qartopu oynayardılar, qəşəng kadrlar çıxardı.
- Gözlə, oynayacaqlar indi - deyib həyətin ortasında uşaqları səsləyirəm:
- Uşaqlar, zəhmət olmasa, hamınız bura gəlin.
Əllərimi yana açıb müqəvva kimi dayanıram:
- İndi hamınız qartopu düzəldib mənə vurun, görək kim yaxşı nişan ala biləcək?

Uşaqlar sevincək qaçıb hərəsi bir qartopu düzəldirlər. Amma vurmaqda tərəddüd edirlər.
- Çəkinməyin, hə, vurun, görək.

Ən cəsarətlisi balaca qızcığaz olur. Əllərinə böyük olan əlcəkləriylə ilk qartopunu o atır mənə. Ardınca hamısı bir-bir qar atəşinə tutmağa başlayır. Onları bu qədər sevincək görmək məni xoşbəxt edir.

...O qədər əziyyət çəkən insanların fonunda uşaqların bu xoşbəxtliyini görəndə məndə bir dilemma yaranır; qarın yağmasını istəyirəm, ya yox?

Foto - İlkin Nəbiyev ©️ APA GROUP