Magistraturaya əlavə qəbul başa çatdı

Budəfəki müsabiqədə 514 bakalavr uğur qazana bilib

Tələbə Qəbulu üzrə Dövlət Komissiyası ali məktəblərinin magistraturasının boş qalan plan yerlərinə aparılan müsabiqənin nəticələrini açıqlayıb. İyulun 28-dən 30-dək aparılmış müsabiqənin yekun nəticələrinə əsasən, 356 ixtisas üzrə 514 bakalavr magistratura pilləsində təhsil almaq hüququ əldə edib.

Komissiyadan Lent.az-a bildiriblər ki, boş yerlərə qəbul edilmiş bakalavrların 414 nəfəri Azərbaycan, 100 nəfəri isə rus bölməsinin məzunlarıdır. Artıq onların siyahısı "Magistr" jurnalının 7-ci sayında dərc edilib və həmin bakalavrlar qəbul olunduqları ali məktəblərdə qeydiyyatdan keçməlidirlər.

Xatırladaq ki, mayın 3-də və iyunun 21-də magistratura pilləsinə iki mərhələdə keçirilən imtahandan sonra plan yerlərinin bir qismi dolmamışdı. Tələbə Qəbulu üzrə Dövlət Komissiyası vakant yerlər üzrə keçirdiyi müsabiqədən sonra həmin yerlərin tutulması üçün 709 bakalavr növbəti dəfə bəxtini sınayıb. Ancaq göründüyü kimi, onlardan 514-ü öz istəyinə çata bilib.

Elxan SALAHOV