“Donuz qripi”nə yoluxmuş azərbaycanlılardan biri uşaqdır

A/H1N1 qripinə yoluxmuş iki xəstə ilə bağlı müəyyən məlumatlar açıqlanıb

A/H1N1 qripinə (“donuz qripi”) yoluxmuş iki xəstə ilə bağlı müəyyən məlumatlar açıqlanıb. Respublika Taun Əleyhinə Stansiyasının direktor müavini Şair Qurbanov APA-ya bildirib ki, xəstələrdən biri - 40 yaşlarında qadın Elmi-Tədqiqat Ağciyər Xəstəlikləri İnstitutuna yerləşdirilib.

Digər xəstə - 15 yaşı uşaq isə 7 saylı Uşaq Yoluxucu Xəstəxanasına yerləşdirilib. Ş. Qurbanov bildirib ki, həmin şəxslərin adları açıqlana bilməz: “Onların hər ikisi Bakıda yaşayan şəxslərdir. Xəstəliyə yoluxmuş qadının uşaqlarını müayinə etdik, onlar sağlamdır. Xəstə uşaqla gələn insanlar da sağlamdırlar. Onların ailə üzvlərini müayinə etmişik. Müayinə gecə saat 4-də qurtardı”.

Ş. Qurbanovun sözlərinə görə, hazırda xəstələrin vəziyyəti normaldır: “Yəqin ki, onlar bir neçə günə evə buraxılacaqlar”.

Qeyd edək ki, Azərbaycanda ilk A/H1/N1 qripi (“donuz qripi”) qeydə alınıb. Səhiyyə Nazirliyinin məlumat xidmətindən APA-ya bildirilib ki, 27.07.2009-cu il tarixində Fransadan və 29.07.2009-cu il tarixdə İngiltərədən səfərdən qayıtmış Bakı və Gəncə şəhər sakinlərində xəstəlik aşkar edilib. Xəstələrin vəziyyətləri kafidir və onlar həkimlərin müşahidəsi altında müalicə kursu keçirlər.

Xəstələrlə təmasda olmuş şəxslər arasında kompleks profilaktik tədbirlər həyata keçirilir.