Vitamin əlavələri qəbulu bioloji qocalmanı ləngidə bilər

Harvard Universiteti və Sürix Universitetinin tədqiqatçılarının da daxil olduğu beynəlxalq elmi qrup tərəfindən aparılan yeni araşdırma müntəzəm Omega-3 qəbulu ilə bioloji qocalma arasında mühüm əlaqə müəyyən edib.

Lent.az "Anadolu" agentliyinə istinadla xəbər verir ki, “Nature Aging” jurnalında dərc olunan tədqiqatda 777 nəfər yaşlı isveçrəlinin üç il ərzində klinik göstəriciləri təhlil olunub.

Tədqiqat nəticələrinə əsasən, gündə bir qram Omega-3 qəbul edən insanlarda bioloji qocalma bu əlavəni qəbul etməyənlərlə müqayisədə dörd ayadək ləngiyib. Bundan əlavə, D vitamini əlavələri qəbul edən və həftədə ən az üç dəfə 30 dəqiqə fiziki aktivliklə məşğul olan iştirakçılar daha çox müsbət təsir müşahidə ediblər. Mütəxəssislər diqqətə çatdırıblar ki, Omega-3 ehtiva edən pəhrizlər iltihabın azalması, oynaq sağlamlığının yaxşılaşması, ürək xəstəlikləri, xərçəng və demans riskinin aşağı olması ilə əlaqələndirilir. İngiltərədəki London Kral Kollecinin geriatrik tibb üzrə tədqiqatçısı Mary Ni Lochlainn bu nəticələrin yaşlı insanlar üçün sadə və nisbətən sərfəli müdaxilələrin effektivliyini sübut etdiyini vurğulayıb.

Bu araşdırma yaşlanma prosesinin gecikdirilməsində qidalanma və həyat tərzi seçimlərinin vacib rol oynadığını bir daha təsdiqləyir.