Eyyub Hüseynov “Quest Net” şirkətinin fəaliyyətini izləyəcək

AİB bir ay monitorinq aparacaq

Daxili İşlər Nazirliyi tərəfindən bu ilin fevralında həyata keçirilən əməliyyat zamanı tutulan “Quest Net” şirkətinin Azərbaycan agentliyinin rəhbəri Mirvaleh Ağayev və agentliyin daha üç əməkdaşı üç həftə əvvəl həbsdən azad edildi. “Quest Net” şirkətinin isə artıq Azərbaycanda rəsmi nümayəndəliyi açılıb və nümayəndəliyə Namiq Abbasov adlı şəxs rəhbərlik edir.

Şirkətin yeni fəaliyyət dövründə istehlakçı hüquqlarının qorunmasına nəzarət olunacaqmı? Azad İstehlakçılar Birliyinin (AİB) sədri Eyyub Hüseynov Lent.az-a açıqlamasında bildirdi ki, “Quest Net” şirkətinin Azərbaycan agentliyinin əvvəlki rəhbərliyinin fəaliyyətindən zərər çəkmiş 200 nəfərə yaxın insan AİB-ə müraciət edib.
Bu günlərdə əvvəlki rəhbərlik tərəfindən hüquqları pozulmuş daha iki istehlakçı AİB-ə müraciət edib.

Eyyub Hüseynov “Quest Net” şirkətinin Azərbaycanda yeni qeydiyyatdan keçmiş rəsmi nümayəndəliyinin fəaliyyəti ilə bağlı AİB-in bu ay ərzində monitorinq aparacağını bildirdi: “Biz “Quest Net” şirkətinin Azərbaycanda yeni qeydiyyatdan keçmiş rəsmi nümayəndəliyinin fəaliyyətini araşdırdıq. Bu agentliyin fəaliyyəti “Elektron ticarət haqqında” qanuna uyğundur. Bununla belə, biz bir ay ərzində onun fəaliyyəti ilə bağlı monitorinq aparacaq və nəticələrini ictimaiyyətə açıqlayacağıq. AİB istehlakçıları da maarifləndirməyə çalışacaq ki, növbəti dəfə aldanmasınlar”.

AİB sədri onu da qeyd etdi ki, “İstehlakçıların hüquqlarının müdafiəsi haqqında” qanunda elektron ticarət sahəsində istehlakçı hüquqları tam qorunmur: “İndiki qanunlar istehlakçıların hüquqlarını qoruya bilmir. Biz dövlətə təklif vermişik ki, elektron ticarət zamanı istehlakçıların hüquqları qorunsun”.