Su kollektoruna düşən körpənin cəsədi dənizdən çıxarılıb

Sentyabrın 13-də saat 22:11-də Suraxanı rayonu Hövsan qəsəbəsinə gedən avtomobil yolunda yol-nəqliyyat qəzasının baş verməsi və vətəndaşın köməyə ehtiyacı olması barədə daxil olmuş əməliyyat məlumatına əsasən Xüsusi Riskli Xilasetmə Xidmətinin Suraxanı rayonu üzrə xilasedici qrupu hadisə yerinə çıxıb.

Lent.az-ın Fövqəladə Hallar Nazirliyinə istinadən məlumatına görə, hadisə yerində əməliyyat şəraitini qiymətləndirərkən məlum olub ki, «VAZ-2106» markalı «10 DB 680» dövlət nömrə nişanlı minik avtomobili yoldan çıxaraq, yolun kənarındakı kanala düşüb.

Məlumata əsasən hadisə nəticəsində avtomobildə yüngül xəsarət almış sürücü 1988-ci il təvəllüdlü Hacıyev Namiq Natiq oğluna və sərnişin 1991-ci il təvəllüdlü Hacıyeva Maya Habil qızına hadisə yerinə çağırılmış Təcili Tibbi Yardım stansiyasının əməkdaşları tərəfindən uyğun yardım göstərilib.

Qəza nəticəsində avtomobildə olan 8 aylıq körpə kanala düşmüş və su onu axınla dənizə doğru aparıb. Xilasedicilər kanalın dənizə çıxan hissəsində axtarış aparmış, körpənin dəniz sularında olduğunu müşahidə ediblər.Körpənin cəsədini dənizdən çıxararaq, hüquq - mühafizə orqanlarının əməkdaşlarına təhvil veriblər.