Güclü istilər zamanı yatağınızı belə sərinlədin - ASAN ÜSUL

Yuxu üzrə mütəxəssis doktor Sita Şah deyir ki, səhər saatlarında sınaya biləcəyiniz sadə bir üsul axşam saatlarında yatağınızı sərinlətmək üçün böyük fərq yarada bilər.

Lent.az bu üsulları sizə təqdim edir:

Yatağınızı dərhal yığmayın. Bu qəribə görsənə bilər, lakin doktor Şah bunun effektiv olduğunu deyir.

O bildirir:
“Mən insanlara tez-tez xatırladıram ki, oyanandan sonra etdiyiniz şeylər yuxu sağlamlığına yatmazdan əvvəl etdikləriniz qədər təsir edə bilər”.

“Xüsusilə isti aylarda yatağı yığmağı təxirə salmaq çox vacib bir vərdiş ola bilər”.

Niyə yayda yatağı dərhal yığmaq olmaz?
Doktor Şahın sözlərinə görə, yatağı dərhal yığmaq isti və nəmi saxlayır.

O izah edir:
“Gecə ərzində bədəniniz istilik, tər və mikroskopik dəri parçaları ifraz edir və bunlar yataq dəstinə hopur. Yay aylarında temperatur və rütubət yüksək olduqda bu təsir daha da güclənir".

Doktor Şah bildirir ki, oyanandan sonra yatağı dərhal yığmaqla siz əslində bu nəmi və istiliyi döşək və çarşafda saxlamış olursunuz.

“Fizioloji baxımdan bu, yorğan altında həm isti, həm də nəmli mikroiqlim yaradır – bu isə mikrobların və allergenlərin, xüsusən də göbələklərin və toz gənələrinin çoxalması üçün ideal şəraitdir".

Toz gənələri – ölü dəri hüceyrələri ilə qidalanan mikroskopik canlılar – nəmli şəraitdə sürətlə çoxalır. Onlar insanı dişləməsələr də, onların ifrazatları astma, ekzema və allergiya simptomlarına səbəb ola bilər, və çoxumuz bu təsirlərə məruz qaldığımızın fərqində olmuruq.

“Yatağı yığmadan qoymaq və yorğanı kənara atmaq yatağın səthini qurumağa və sərinləməyə imkan verir, bu da toz gənələrinin yaşaması üçün lazım olan nəmli mühiti pozur".

“Bəziləri üçün səliqəli görünən yataq yayda sağlamlıq baxımından zərərli ola bilər, əgər çox tez yığılarsa",

Bəs nə etməli?
Doktor Şah məsləhət görür ki, oyandıqdan dərhal sonra yorğanı kənara atın.

“Yorğanı və ya çarşafı yatağın ayaq tərəfinə yığın və pəncərələri açın ki, otaq havalansın".

Yatağı yığmazdan əvvəl ən azı 30–60 dəqiqə gözləmək tövsiyə olunur.
“Bu, yataq dəstinə qurumaq və sərinləmək üçün vaxt verir, nəticədə daha gigiyenik və rahat bir yuxu mühiti yaranır".

Son olaraq o, nəfəs alan və yay üçün uyğun yataq dəstindən – məsələn, pambıq və ya kətandan – istifadə etməyi və yayda çarşafları həftədə ən az bir dəfə yumağı tövsiyə edir.

İsti havalarda mütəxəssislər necə yatır?
Əgər hələ də yatmaqda çətinlik çəkirsinizsə, mütəxəssislər güclü istilər zamanı sınaya biləcəyiniz bəzi sadə üsullarla bölüşür:

İstiliyin qarşısını alın:
“Günəş şüalarına məruz qalan otaqlarda jalüzləri və pərdələri bağlayın. Kölgə otağın daha sərin qalmasına kömək edəcək".

Havanın dövranını təmin edin:
Yuxu üzrə mütəxəssis Ceyms Uilson (The Sleep Geek) otağınızın qapısını və digər otaqlardakı pəncərələri açıq saxlamağı tövsiyə edir.
Digər otaqlardakı pəncərələr və qapılar daha çox hava dövranına imkan yaradacaq.

Burunla nəfəs alın:
Dr. Nerina Ramlahan “burundan nəfəs alma bədəni təbii yolla sərinlədir və sinir sistemini sakitləşdirir” – deyə Metro qəzetinə bildirib.

İlıq duş qəbul edin:
Soyuq duş cazibədar görünsə də, Nerinanın sözlərinə görə, ilıq duş daha faydalıdır. Başınızı və saçlarınızı isladın – bu, bədən temperaturunu aşağı salmağa kömək edəcək. Ancaq çox soyuq və ya çox isti duşlar bədəni oyaq saxlayaraq əks təsir göstərə bilər.