İyulun 2-də keçirilən qəbul imtahanının nəticələri açıqlandı

Tələbə Qəbulu üzrə Dövlət Komissiyası (TQDK) iyulun 2-də V ixtisas qrupuna, 11 illik və 9 illik bazadan kolleclərə əvvəlki illərin məzunları üçün keçirilmiş qəbul imtahanlarının nəticələrini açıqlayıb. TQDK-nın mətbuat xidmətindən Lent.az-a verilən məlumata görə, imtahan nəticələri ilə TQDK-nın internet saytında və ya iş nömrəsini ( buraxılış imtahanı vermiş şəxslər isə şagird kodunu) 7727 nömrəsinə göndərməklə tanış olmaq olar.

Ümumi (9 illik) orta təhsil bazasında orta ixtisas təhsili müəssisələrinə (kolleclərə) imtahan ana dili (Azərbaycan bölməsinin şagirdləri üçün - Azərbaycan dili, rus bölməsinin şagirdləri üçün - rus dili fənni) və riyaziyyat fənləri üzrə keçirilib. Abituriyentlərə hər bir fənn üzrə 30, ümumilikdə 60 test tapşırığı təqdim olunub. 1 sual bir balla qiymətləndirilir və sualların cavablandırılmasına 1 saat 30 dəqiqə vaxt ayrılır. Ümumi balı 16-dan, hər bir fənn üzrə balı 8-dən az olmayan abituriyentlər ixtisas seçiminə buraxılır. Nəticələrə əsasən, imtahanda iştirak etmək üçün qeydiyyatdan keçmiş 12942 abituriyentdən 1734 nəfəri imtahana gəlməyib. İmtahanda iştirak edən 11208 abituriyentdən 15 nəfəri imtahan qaydalarını pozduğu üçün imtahandan xaric olunub və nəticələri ləğv edilib. 6984 abituriyent müsabiqə şərtini ödəyərək ixtisas seçimində iştirak etmək hüququ qazanıb.

V ixtisas qrupuna və tam (11 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları üçün qəbul imtahanı İmtahan Bakı, Naxçıvan, Gəncə, Tovuz, Sumqayıt, Mingəçevir, Şəki, Ağcabədi, Göyçay, Şirvan, Salyan, Lənkəran, Masallı və Xaçmaz şəhərlərində aparılıb. Nəticələrə əsasən, imtahanda iştirak etmək üçün qeydiyyatdan keçmiş 16151 abituriyentdən 3868 nəfəri imtahana gəlməyib. İmtahanda iştirak edən 12283 abituriyentdən 26 nəfəri imtahan qaydalarını pozduğu üçün imtahandan xaric olunub və nəticələri ləğv edilib. TQDK-nın saytında 12257 abituriyentin imtahan nəticələri yerləşdirilib.