Qənirə Paşayeva Türkiyədə Şuşa ilə bağlı çıxış edib

Türkiyənin Giresun Universitetində Şuşanın Ermənistan tərəfindən işğalının 21-ci ildönümü ilə bağlı tədbir keçirilib. Lent.az-ın məlumatına görə, tədbiri giriş sözü ilə açan Giresun Universitetinin rektoru Aygün Attar Şuşanın dünyada yaşayan bütün azərbaycanlıların, türklərin mədəniyyət evi olduğunu bildirib və tədbir iştirakçılarının əksəriyyətinin Şuşada olmamasına baxmayaraq, bu şəhərin hər birimiz üçün doğma şəhər olduğunu qeyd edib.

Tədbirdə çıxış edən millət vəkili Qənirə Paşayeva qeyd edib ki, Şuşa əsrlər boyu Azərbaycan mədəniyyətinin beşiyi olub. Bu şəhərdə mədəniyyətə əvəzsiz töhfələr verən dahi şəxsiyyətlər orada yetişib: “Hər bir azərbaycanlı Şuşanı tək bu gün deyil, hər gün yad etməli və gələcək nəsillərə çatdırmalıdır. Hər birimiz Şuşanı doğma şəhər kimi sevməliyik, xatırlamalıyıq ki, Şuşamız işğal altındadır. Çox təəssüf ki, işğalçılar tariximizi silmək üçün orada yerləşən mədəniyyət və tarixi abidələri məhv edirlər və dünya buna göz yumur”.

Millət vəkili çıxışında Xocalı soyqırımı, Ermənistanın işğal etdiyi Azərbaycan torpaqlarında törətdiyi vandalizm aktları, barədə ətraflı məlumat da verib.