Nazir: “Son 10 ildə səhiyyə xərcləri 11 dəfə artıb”

“Son 10 ildə ölkə büdcəsində səhiyyə xərcləri 11 dəfədən çox artıb, Azərbaycanda müasir tibb avadanlığı və cihazlarla təchiz olunan 500-dən çox səhiyyə müəssisəsi əhalinin istifadəsinə verilib”. Lent.az-ın məlumatına görə, bunu səhiyyə işçilərinin peşə bayramı münasibəti ilə keçirilən kollegiya iclasında səhiyyə naziri oqtay Şirəliyev deyib. Nazir bildirib ki, maddi-texniki bazası gücləndirilən tibb müəssisələri bir sıra hallarda dünyanın qabaqcıl səhiyyə ocaqlarından geri qalmır, hətta bəzən onları üstələyir.

Nazir səhiyyənin ən aktual problemləri üzrə qəbul edilən dövlət proqramlarının icrasının əhalinin sağlamlığının mühafizəsi ilə əlaqədar çox mühüm vəzifələri uğurla yerinə yetirdiyini deyib: “Bu gün həmin proqramların icrası nəticəsində ölkədə 27 Hemodializ mərkəzi, Heydər Əliyev Fondunun rəhbəri Mehriban Əliyevanın təşəbbüsü ilə yaradılan “Talassemiya” mərkəzi, Milli Onkologiya Mərkəzinin Uşaq klinikası, Respublika Uroloji Klinik Xəstəxanası, Avropa standartlarına uyğun ən son texnologiyalarla təchiz olunan Diaqnostika mərkəzləri əhaliyə xidmət edir. Bu gün ölkəmizdə ən ağır orqan transplantasiyası əməliyyatları uğurla icra olunur”.

O. Şirəliyev deyib ki, Azərbaycanda yüksək ixtisaslı kadr hazırlığına çox böyük önəm verilir. Tibb təhsilində rezidenturanın tətbiqi, tibb işçilərinin sertifikasiyası və mərkəzləşmiş imtahanla işə qəbulu da məhz buna xidmət edir.