Maqsud İbrahimbəyov I Fəxri xiyabanda dəfn edilib - YENİLƏNİB

Dünən vəfat edən xalq yazıçısı Maqsud İbrahimbəyov dəfn edilib.

APA-nın xəbərinə görə, Maqsud İbrahimbəyov I Fəxri xiyabanda torpağa tapşırılıb.

Dəfn mərasimində mərhumun yaxınları, həmkarları, ictimaiyyət nümayəndələri iştirak edib.

14:18

Bu gün Akademik Milli Dram Teatrında xalq yazıçısı Maqsud İbrahimbəyovla vida mərasimi keçirilib. APA-nın xəbərinə görə, vida mərasimində mərhumun qardaşı Rüstəm İbrahimbəyov, Prezident Administrasiyasının humanitar siyasət məsələləri şöbəsinin müdiri Fatma Abdullazadə, Moskva Dövlət Universitetinin Bakı filialının rektoru Nərgiz Paşayeva, mərhumun ailə üzvləri, yaxınları, həmkarları, dövlət və ictimaiyyət nümayəndələri iştirak edib.

Vida mərasimini giriş nitqi ilə Azərbaycan Yazıçılar Birliyinin (AYB) sədri, xalq yazıçısı Anar açıb. O bildirib ki, Azərbaycan ədəbiyyatına ağır itki üz verib: “Biz 56 il bundan qabaq Maqsudla tanış olmuşuq. Birlikdə ssenari kurslarını bitirmişik. Amerikadan Çinə qədər səfərlərdə olmuşuq. Maqsud “60-cılar” nəslinin layiqli nümayəndələrində idi. Artıq “60-cı lar” nəslinin yarpaq tökümü başlayıb. Bizim xalq istedadlı xalqdır. Yenə yaxşı şairlər, yaxşı yazıçılar yetişəcək. Amma heç vaxt 2-ci Maqsud olmayacaq. Biz Maqsudla bir yerdə sevinmişik, bir yerdə gülmüşük. Bu gün Maqsudun müəllifi olduğu əsərlərinin oynandığı teatrda onunla vidalaşırıq. Biz yaşadıqca Maqsud da yaşayacaq”.

Akademik, millət vəkili Rafael Hüseynov qeyd edib ki, Maqsud İbrahimbəyovun povestləri, esseləri gələcəkdə də yaşayacaq: “Maqsud İbrahimbəyov bədii yaradıcılıqla yanaşı, siyasi publisistika ilə də məşğul olurdu. Maqsud İbrahimbəyovun əsərlərində onun Azərbaycan dövlətçiliyinə sədaqəti görünür. 80-ci illərin sonu, 90-cı illərin əvvəllərində, 2000-ci illərdə düşmənlərimiz bizə hədyanlar yağdırdılar. Belə anlarda Maqsud İbrahimbəyov qələmə sarılıb və hər zaman Azərbaycanı müdafiə edirdi”.

Xalq artisti Azərpaşa Nemət bildirib ki, Maqsud İbrahimbəyovun əsərlərinin mərkəzində özü dayanıb: “Bu gün Maqsud danışmasa da, onun ruhu bizi duyur. Mənə elə gəlir ki, Maqsudla vidalaşmırıq, “gələn görüşlərədək”, deyirik”.

Mərhumun oğlu Murad İbrahimbəyov da çıxış edib və atasının yaradıcılıq uğurlarına nail olduğunu bildirib.

Maqsud İbrahimbəyov I Fəxri Xiyabanda dəfn olunacaq.

Qeyd edək ki, Maqsud İbrahimbəyov dünən 81 yaşında vəfat edib.

12:08

Bu gün Akademik Milli Dram Teatrında xalq yazıçısı Maqsud İbrahimbəyovla vida mərasimi keçirilir.

APA-nın məlumatına görə, vida mərasimində mərhumun qardaşı Rüstəm İbrahimbəyov, Prezident Administrasiyasının humanitar siyasət məsələləri şöbəsinin müdiri Fatma Abdullazadə, Moskva Dövlət Universitetinin Bakı filialının rektoru Nərgiz Paşayeva, dövlət və ictimaiyyət nümayəndələri iştirak edir.

Qeyd edək ki, xalq yazıçısı Maqsud İbrahimbəyov uzun sürən ürək xəstəliyindən sonra martın 22-də 81 yaşında vəfat edib.