Magistraturada yüksək bal toplayanlar - SİYAHI

Magistratura imtahanının I mərhələsində yüksək bal toplayan bakalavrların kimliyi bəlli olub.

Lent.az Təhsil Nazirliyinə istinadən bildirir ki, Prezident yanında Dövlət İdarəçilik Akademiyası, Bakı Mühəndislik Universitetinin tələbələri mümkün 100 baldan 99 bal toplayıb.

Onlardan Bakı Mühəndislik Universitetinin tələbəsi Qalib Sarayev Balakən şəhəri Humanitar və texniki təmayüllü liseyi qızıl medalla bitirib, 667 balla ali məktəbə daxil olub. Magistraturaya qəbul imtahanının birinci mərhələsində mümkün 100 baldan 99 bal toplayıb.

O ixtisası üzrə irəli gedib, dünyanın tanınmış İT şirkətlərində çalışmaq istəyir: “Məqsədim ən yüksək bal toplayaraq birinci olmaq idi. İmtahandan sonra ümidim var idi ki, yüz bal toplamışam. Amma birincilikdən cəmi bir bal ayırdı. Təhsilimi Bakı Mühəndislik Universitetində davam etdirəcəyəm. Bundan sonra məqsədim öz ixtisasım üzrə peşəkar olmaq üçün çalışmaqdır. Hesab edirəm ki, təhsilim hələ qarşıdadır”.

Magistraturaya qəbul imtahanının birinci mərhələsində 99 bal toplayan digər bakalavr Fəxri Qurbanzadə isə Azərbaycan Respublikasının Prezidenti yanında Dövlət İdarəçilik Akademiyasının məzunudur.

Fəxri Qurbanzadə Bərdə rayon Qarağacı kənd tam orta məktəbini bitirib, 641 balla ali məktəbə daxil olub.

O bildirib ki, Akademiyada dərslərə hər zaman hazırlıqlı olub və hər zaman məsuliyyətli olmağa çalışıb: “Magistraturaya hazırlaşan zaman da çalışırdım ki, məsuliyyəti olum. Çünki məqsədim var idi, maksimum bal toplamalı idim. Sualların hamısını cavablandırmışdım. Sadəcə cəmi birində diqqətsizlik etdim. İxtisasım beynəlxalq münasibətlərdir. Elə ixtisasım üzrə də Dövlət İdarəçilik Akademiyasında təhsilimi davam etdirəcəyəm”.

Magistratura qəbul imtahanında 99 bal toplayıb Yaşar Nəsibov isə Bakı Mühəndislik Universitetinin məzunudur.

O, 2012-ci ildə Şəki şəhər Nizami Gəncəvi adına 7 saylı tam orta məktəbi qızıl medalla bitirib, 679 balla ali məktəbə qəbul olub. 5 il ərzində Prezident təqaüdü ilə təhsil alan Yaşar magistratura qəbul imtahanında 99 bal toplayıb: “Respublika birincisi olmağı qarşıma məqsəd qoymuşdum. Uğur qazanmaq üçün ailəmin, yaxınlarımın, müəllimlərin dəstəyi çox böyük oldu. Əgər qarşına məqsəd qoyursansa, onun üçün çalışmaq lazımdır və o zaman nəticəni mütləq görmək olur. Dünya iqtisadiyyatı ixtisası üzrə təhsil alıram. Təhsilimi Bakı Mühəndislik Universitetində davam etdirəcəyəm”.