ABŞ ordusunun keçmiş snayperi Nik Betts Nevada ştatındakı məşhur “Zona 51” hərbi bazasının yaxınlığında yadplanetli olduğu iddia edilən sürünənəbənzər varlıqlara qarşı məxfi hərbi əməliyyat keçirildiyini açıqlayıb.
Lent.az xarici KİV-ə istinadən xəbər verir ki, keçmiş hərbçinin iddiasına görə, əməliyyat zamanı azı bir amerikalı əsgər həlak olub.
Betts bildirib ki, ABŞ Silahlı Qüvvələrinin elit xüsusi təyinatlı bölmələrindən birində xidmət edən, adı açıqlanmayan hərbçi ona qeyri-adi əməliyyat barədə danışıb.
Həmin şəxsin sözlərinə görə, ABŞ-ın tam məxfi hərbi obyektinə daxil olduğu iddia edilən üç naməlum varlığı məhv etmək üçün xüsusi hərbi qrup göndərilib. Əsgərlərə adi güllələr əvəzinə enerji şüaları ilə işləyən silahlar verilib.
İddiaya əsasən, Nevada ştatındakı hərbi bazanın yaxınlığında yerləşən dərin yeraltı tuneldə keçirilən əməliyyat zamanı amerikalı əsgərlərdən biri sinəsindən vurularaq yerindəcə ölüb.
“Onlar iki ayaq üzərində hərəkət edən, sürünənə bənzəyən, lakin barmaqları olan bir varlığı güllələdiklərini söylədilər. Həmin varlıq da eyni tipli enerji silahından istifadə edirmiş”, – deyə Betts bildirib.
“Bu barədə danışmamağım üçün məni hədələdilər”
İraq və Əfqanıstanda xidmət etmiş keçmiş snayper bu hadisə barədə hərbi xidmət yoldaşları Kevin Kent və Rayan Uilyamsla söhbətində danışıb.
Onun sözlərinə görə, hekayənin doğruluğuna inanmasına səbəb “Zona 51”dəki əməliyyatda iştirak etdiyi iddia edilən başqa bir əsgərin reaksiyası olub.
Betts bildirib ki, həm məlumatı ona ötürən şəxs, həm də digər hərbçi bu barədə heç kimə danışmaması üçün onu hədələyiblər.
Keçmiş snayper etiraf edib ki, hadisəni ona danışan hərbçi həmin vaxt sərxoş olub. Bununla belə, Betts onun şüurunun yerində olmasını və danışdıqlarının fərqində olduğunu iddia edib.
Yeraltı bazada nə baş verib?
Bettsin sözlərinə görə, hər şey Şimali Karolina ştatındakı Fort-Breqq hərbi bazasından xüsusi təyinatlı bölmənin təcili əməliyyata çağırılması ilə başlayıb.
Əsgərlərə “Zona 51”dən bir neçə kilometr uzaqlıqda yerləşən yeraltı hərbi obyektə daxil olmaq tapşırılıb.
İddiaya görə, hərbçilər əvvəlcə təyyarə ilə Nevada ştatına aparılıb, daha sonra “Zona 51” bazasında xüsusi təlimatlandırmadan keçiblər.
Onlara güllə əvəzinə enerji impulsları buraxan yüksək texnologiyalı silahlar təqdim edilib. Bundan sonra əsgərlər helikopterlə yeraltı kompleksə aparan uzun tunelin girişinə çatdırılıblar.
Betts bildirib ki, fövqəladə vəziyyət hadisə yerinə göndərilən ilk çevik reaksiya qrupunun geri qayıtmamasından sonra yaranıb.
Həmin hərbçilərin öldüyü, yoxsa itkin düşdüyü barədə məlumat verilməyib.
Ardınca təxminən altı əsgərdən ibarət ikinci qrup tunellərdə axtarış aparmağa başlayıb.
İddiaya əsasən, hərbçilər burada sürünənəbənzər naməlum varlıqla qarşılaşıblar. Varlığın da əsgərlərə verilən silahla eyni tipli enerji silahından istifadə etdiyi bildirilir.
Əsgərlər cavab atəşi açaraq həmin varlığı öldürüblər. Bettsin mənbəsinin sözlərinə görə, əməliyyat nəticəsində hər üç naməlum varlıq tapılaraq məhv edilib.
Ölən əsgərin cəsədinin gizlicə yandırıldığı iddia olunur
Keçmiş snayperin açıqlamasında ən diqqətçəkən məqamlardan biri əməliyyatda öldüyü iddia edilən amerikalı hərbçinin taleyi ilə bağlıdır.
Bettsin sözlərinə görə, öldürülən əsgərin cəsədi elə hadisə yerindəcə yandırılıb.
Komanda yoldaşları isə hərbçinin katolik inancına görə buna etiraz ediblər.
Mənbənin iddiasına əsasən, hadisəni gizlətmək üçün əsgərin təlim zamanı baş vermiş bədbəxt hadisədə öldüyü və cəsədinin yanaraq məhv olduğu barədə uydurma məlumat hazırlanıb.
Betts həmçinin bildirib ki, yadplanetlilərin daxil olduğu iddia edilən məxfi obyekt texnoloji baxımdan Pentaqonun ən ciddi qorunan bölmələrindən belə üstün olub.
“Zona 51”də həqiqətən yadplanetlilər varmı?
ABŞ-ın Nevada ştatında yerləşən “Zona 51” hərbi obyekti uzun illərdir naməlum uçan obyektlər və yadplanetlilərlə bağlı müxtəlif iddiaların mərkəzindədir.
1940-cı illərdən etibarən bu ərazi məxfi hərbi tədqiqatlar və eksperimental təyyarələrin hazırlanması ilə əlaqələndirilir.
İllər ərzində bəzi şəxslər Yer kürəsində sürünənlərə bənzəyən yadplanetli varlıqların mövcud olduğunu, hətta ən azı dörd fərqli yadplanetli növünün müəyyənləşdirildiyini iddia ediblər.
Lakin ABŞ ordusu və Ağ Ev yadplanetlilərin mövcudluğunu təsdiqləyən fiziki sübutların aşkar edilmədiyini bildiriblər.
Nik Bettsin danışdığı hadisə də müstəqil şəkildə təsdiqlənməyib. Onun iddialarını sübut edən rəsmi sənədlər, görüntülər və ya digər maddi dəlillər təqdim olunmayıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
