İqtisad Universitetində açıq dərs canlı yayımlandı

Azərbaycan Dövlət İqtisad Universiteti (ADİU) tədris prosesində innovasiyanın tətbiqi və keyfiyyət göstəricilərinin yüksəldilməsi məqsədi ilə növbəti yeniliyə imza atılıb.

Universitetin mətbuat xidmətindən Lent.az-a verilən məlumata görə, ADİU-nun gənc müəllimi Ramil Cabbarovun “Açıq dərs”i “Youtube” vasitəsilə canlı yayımlanıb. İnteraktiv tədris metodlarının tətbiqi ilə təşkil olunan məşğələdə universitet rektoru Ədalət Muradov və tədris heyətinin nümayəndələri, müəllimlər iştirak ediblər.

Dərsin başlanğıcında çıxış edən rektor bildirib ki, universitetə cəlb edilən gənc müəllimlər arasında ciddi rəqabətin aparılması istənilir: "Bu baxımdan gənc müəllimlərə daim dəstək verməyi də özümüzə borc bilirik. Dərslərin ictimaiyyətə açıq olması təşəbbüsü universitetdə ənənəyə çevriləcək".

Bildirək ki, “Marketinq tədqiqatları və marketinq informasiya sistemləri” mövzusu üzrə təşkil edən dərsdə qrup şəklində real situasiya təhlil edilib. İnnovativ tədris metodların tətbiq olunduğu məşğələdə tələbələr şirkət nümayəndəsi rolunda çıxış edərək marketinq kəşfiyyatları aparıb, sorğular təşkil ediblər. İnteraktiv formada keçən dərsdə tələbələr problemlərin həll olunmasında kreativ yanaşma texnikalarını nümayiş etdiriblər.

Dərslərin ictimaiyyətə açıq formada keçirilməsi ənənəsi İqtisad Universitetində davam etdiriləcək. Açıq dərsi izləmək üçün bu linkə daxil ola bilərsiniz: https://www.youtube.com/watch?v=AVmBuNhrUu8