Göygöl Milli Parkının direktoruna şiddətli töhmət verilib

Göygöl Milli Parkında ziyarətçilərin ərazidə təmizliyə riayət etməməsi faktları ilə bağlı həyata keçirilən təxirəsalınmaz tədbirlər, o cümlədən aparılan kütləvi maarifləndirmə işləri və tətbiq edilən ciddi qaydalara rəğmən təəssüf ki, yenə də Göygöl Milli Parkının bəzi yerlərində ziyarətçilər tərəfindən atılmış tullantılara rast gəlinir.

ETSN-nin mətbuat xidmətindən Lent.az-a verilən məlumata görə, qoyulan qadağalara baxmayaraq Maralgöl ərazisinə ziyarətçilər hansısa yollarla müxtəlif ərzaq və içkilər keçirir, sonra boş şüşələr ətrafa və hətta gölə atılır.

Bu günlərdə də sosial şəbəkədə Maralgöl ərazisinin vətəndaşlar tərəfindən müxtəlif məişət tullantıları ilə çirkləndirilməsi, ziyarətçilərin qaydalara əməl etməməsi qınağa səbəb olub.

Nazirlik də öz növbəsində bu cür halların milli park əməkdaşlarınının öz xidməti vəzifələrinə laqeyd yanaşmalarının göstəricisi, vaxtında sərt tədbirlərin görülməməsi, nəzarət funksiyalarının lazımınca yerinə yetirilməməsi və milli park rəhbərliyinin öz vəzifələrini lazımi şəkildə icra edə bilməməsi kimi qiymətləndirilib.

Bununla əlaqədar olaraq Göygöl Milli Parkına gələn ziyarətçilərin Maralgöl ərazisini məişət tullantıları ilə çirkləndirməsinin qarşısını almadığına, lazımi qaydada nəzarət yaratmadığına və Milli Park əməkdaşlarının öz xidməti vəzifələrinə daha ciddi və məsuliyyətlə yanaşmalarını təmin etmədiyinə görə Göygöl Milli Parkının direktoruna şiddətli töhmət, Nazirliyin milli parklara nəzarət edən departamentinin rəhbərinə isə töhmət, belə halların qarşısının alınması və təkrar olunmaması məqsədi ilə müvafiq qurumlara göstərişlər verilib.

Bioloji Müxtəlifliyin Qorunması və Xüsusi Mühafizə Olunan Təbiət Ərazilərinin İnkişafı Departamentinə isə tapşırılıb ki, milli parkların fəaliyyəti üzərində nəzarət sistemini təkmilləşdirsin, təbiət ərazilərini çirkləndirən, rejimi pozan şəxslərin vaxtında aşkar olunması və adlarının daxili qaydaları pozanlar üçün nəzərdə tutulan “Qara Siyahı”ya salınaraq parka buraxılmaması və Azərbaycan Respublikası İnzibati Xətalar Məcəlləsinin tələblərinə əsasən cərimələnməsi üçün təcili tədbirlər görsün.

Qeyd edək ki, Göygöl Milli Parkına 2016-cı ilin ötən ayları ərzində, 6 yaşınadək uşaqlar da daxil olmaqla, yüz minədək ziyarətçi gəlib.