Azərbaycanın 4 ali məktəbi beynəlxalq akkreditasiyadan keçib

Azərbaycan Dövlət İqtisad Universitetinin (ADİU) MBA Departamenti İdarəetmənin İnkişafı üzrə Avropa Fonduna (EFMD) və həmin fondun Qlobal şəbəkəsinə (EFMD Qlobal) tam üzvlüyə qəbul edilib. Lent.az-ın nazirliyin saytına istinadən xəbərinə görə, bu, ADİU üçün biznesin idarə edilməsi üzrə proqram heyəti və magistrant mübadiləsinə, akademik əməkdaşlığa və dünyanın qabaqcıl universitetləri ilə qarşılıqlı əlaqələrin inkişafına geniş imkanlar yaradır.

81 ölkədən 800-dən artıq akademik təşkilat, biznes və dövlət qurumlarının birləşdiyi EFMD idarəetmənin inkişafı sahəsində informasiya mübadiləsi, tədqiqatların aparılması, qabaqcıl təcrübə mübadiləsi, iqtisadiyyat təmayüllü təhsil müəssisələrinin rasionallaşdırılması üzrə yeganə təşkilatdır.

EFMD dünyanın aparıcı təhsil sistemlərinin standartlarına cavab verən biznes məktəblərinin, biznes təhsili proqramlarının, korporativ universitetlərin və texnologiyalara əsaslanan tədris proqramlarının qiymətləndirilməsi üzrə akkreditasiya xidmətlərini həyata keçirir.

İsveçrənin Cenevrə şəhərində yerləşən EFMD Qlobal isə Avropa və digər regionlarda 700-dən çox üzvü olan biznes məktəbləri, universitetlər və şirkətlər şəbəkəsidir.

Eləcə də ilk dəfə olaraq, Azərbaycan Texniki Universitetinin 4, Sumqayıt Dövlət Universitetinin 3 və Dövlət Neft Akademiyasının 3 ixtisası Avropa akkreditasiya agentliyinin (ASİİN) sertifikatı ilə təmin edilib.