“Azərsu” sudan qanunsuz istidadə edilən yerləri açıqladı

İçməli sudan qeyri-qanuni istifadə ilə bağlı 849 fakt aşkarlandı

“Azərsu” Açıq Səhmdar Cəmiyyəti istehlakçıların içməli su təchizatı və kanalizasiya xidmətlərindən istifadəsinin yaxşılaşdırılması ilə yanaşı, bu sahədə dəqiq uçot sisteminin yaradılması, xidmətlərdən qeyri-qanuni istifadənin qarşısının alınması istiqamətində kompleks nəzarət tədbirləri həyata keçirir.

Cəmiyyətin mətbuat xidmətindən Lent.az-a verilən məlumata görə, Bakı şəhəri və Abşeron yarımadasında, eləcə də regionlarda həyata keçirilən infrastruktur layihələri göstərilən xidmətlərin keyfiyyətinin yüksəldilməsinə hesablansa da, bəzi istehlakçılar tərəfindən sui-istifadə hallarına yol verilir.

“Su təchizatı və tullantı suları haqqında” qanun tələblərinə əsaslanaraq, “Azərsu” ASC-nin Abonent işləri departamenti və yerli sukanal idarələrinin əməkdaşları mütəmadi olaraq su təchizatı və kanalizasiya sistemlərinə baxış keçirir, xidmətlərdən istifadənin vəziyyətini araşdırır. Cari ilin yanvar-iyun aylarında aparılan nəzarət tədbirləri nəticəsində içməli sudan qeyri-qanuni istifadə halları ilə bağlı 849 fakt aşkarlanıb. Araşdırmalar nəticəsində “Azərsu”ya dəymiş ziyanın məbləği 2,4 milyon manat müəyyən edilib. Görülmüş tədbirlər nəticəsində bu məbləğin 993 min manatının ödənilməsi təmin edilib. Təkcə cari ilin iyun ayında içməli sudan və kanalizasiya xidmətlərindən qanunsuz istifadə ilə bağlı 194 fakt aşkarlanıb. Bunlardan 168-i Bakı şəhərində, 26-sı müxtəlif rayonlarda qeydə alınıb. Qiymətləndirmə nəticəsində “Azərsu” ASC-yə dəymiş ziyan 279,6 min manat məbləğində müəyyən edilib və bunun 210,3 min manatının ödənilməsi təmin olunub.

Araşdırmalar göstərir ki, su təchizatı və kanalizasiya xidmətlərindən qanunsuz istifadəyə daha çox içməli suyun böyük miqdarda istehlak edildiyi yerlərdə - restoran, hamam, avtoyuma kimi obyektlərdə rast gəlinir. Bəzən smart-kart sayğacların quraşdırılmasına baxmayaraq, abunəçilər içməli suya olan tələbatını sayğacdankənar qoşulmalar hesabına ödəyirlər. Belə hallar aşkarlandıqda içməli sudan və kanalizasiya xidmətlərindən qanunsuz istifadə edən abunəçilərin su təchizatı qeyd-şərtsiz dayandırılır və “Azərsu” ASC-yə dəymiş ziyanın həmin abunəçilər tərəfindən ödənilməsi tələb edilir.