Süni intellekt yaxın 5 ildə bu peşələri əvəz edəcək - SİYAHI

Bəzi insanlar özlərinə yeni qazanc yolları axtarmağa məcbur qalacaqlar.

Lent.az-ın xarici KİV-ə istinadla cxəbərinə görə, süni intellekt artıq uzun müddətdir ki, həyatımızın bir hissəsinə çevrilib – məişət texnikası, cib qurğuları, kompüterlər və bir çox tibbi cihazlar – bunların hamısı müəyyən prosesləri yerinə yetirən robotlardır. Texnologiya nə qədər sürətlə inkişaf edirsə, insanlar bir o qədər çox düşünür ki, yaxın gələcəkdə süni intellekt hansı peşələri əvəz edə bilər.

Süni intellekt yaxın 5 ildə kimləri əvəz edəcək?

Texnologiyasız dövlətin inkişafı mümkün deyil – bu, artıq XIX əsrin sonu – XX əsrin əvvəllərində aydın olmuşdu. Həmin dövrdə fabrik və zavodların tikintisi aktivləşmişdi. İlk mexanizmlər və maşınlar məhz o zaman insan əməyini asanlaşdırmaq üçün yaradılmışdı. XXI əsrdə isə biz artıq qol saatı ilə zəng etmək, mənzilə girmədən çaydanı işə salmaq, musiqi kolonkasına insan kimi sual vermək və sürücüsüz maşında səyahət etmək imkanına sahibik.

“Robotam”, “Qara güzgü” kimi filmlər artıq fantastik görünmür – süni intellektin insanlarla birgə yaşadığı gələcək artıq reallığa çevrilir. Bu baxımdan Boston Dynamics şirkətinin yaratdığı robotlar həm heyrətləndirici, həm də qorxuludur.

Süni intellekt tərtibatçıları “tələbələrini” insanın edə biləcəyi əmrləri yerinə yetirməyə öyrədirlər. Yorulmayan, yatmağa, yeməyə ehtiyac duymayan, xəstələnməyən və şəxsi istəkləri olmayan robotlar demək olar ki, hər şeyə qadirdir. Hərçənd onlar süni varlıqlardır, yenə də intellektə sahibdirlər – məsələn, ChatGPT artıq öz tərtibatçılarını aldada bilir.

Pew Research mərkəzinin keçirdiyi sorğuya əsasən, amerikalıların 52 faizi iş yerlərinin süni intellektlə əvəz olunacağından narahatdır.

İş elanları platforması Indeed 11 peşədən ibarət siyahı təqdim edib və bu siyahıdan görünür ki, yaxın gələcəkdə aşağıdakı sahələrdə insanlar süni intellektlə əvəz oluna bilər:

İstehsalat – robotlar məhsulların yığılması, yoxlanılması, test edilməsi və qablaşdırılması kimi işləri görə bilər. Bu sahədə çalışan insanlar artıq lazım olmayacaq.

Ordu – süni intellekt kəşfiyyatçılar yerinə işləyə, məlumat toplaya və təhlil edə, düşmənin davranışında nümunələri müəyyənləşdirə və avtomatik cavab verə bilər.

Pərakəndə satış – süni intellekt satıcı, qablaşdırıcı, məhsul mütəxəssisi, təmizlikçi və hətta satış nümayəndəsini əvəz edə bilər.

Logistika və nəqliyyat xidmətləri – taksi sürücüləri, şoferlər, kuryerlər və logistlər artıq süni intellektin yerinə yetirə biləcəyi funksiyalardır.

Onlayn satış – süni intellekt tətbiqləri müştəri məlumatlarını təhlil edə, zəng və SMS göndərə, məsləhət verə və satış edə bilər.

Məlumat analizi – böyük həcmdə məlumat toplayan və işləyən şirkətlər bu işlərdə süni intellektdən istifadə edə bilər.

Maliyyə analitikləri – məlumatların proqnozlaşdırılması və təhlili artıq alqoritmlər vasitəsilə daha dəqiq yerinə yetirilə bilər.

Mətnlərin emalı və redaktəsi – süni intellekt artıq mətnləri tərtib edə, redaktə və hətta tərcümə edə bilir.

Müştəri dəstəyi – chatbotlar artıq çoxsaylı müştəri suallarını cavablandıra bilir.

Qrafik dizayn – generativ süni intellekt ilə şəkil və dizayn yaratmaq mümkündür.

Mühasibatlıq – alqoritmlər hesabatların aparılması, vergilərin hesablanması və maliyyə planlaşdırmasını insan müdaxiləsi olmadan edə bilər.