Fazil Mustafa həbslərlə bağlı məlumatlandırılıb - AÇIQLAMA

"Hazırda Fazil Mustafanın müalicə prosesi davam etdirilir. Durumu günü-gündən yaxşılaşır".

Bu sözləri Lent.az-a ötən həftə güllələnən Milli Məclisin deputatı Fazil Mustafanın köməkçisi Əjdər Əliyev deyib.

Onun sözlərinə görə, Fazil Mustafanın evə buraxılma tarixi hələ dəqiq bilinmir:

"Həkimlər müalicə və reabilitasiya prosesinin yaxşı irəlilədiyini bildiriblər. Hər şey belə getsə, yaxın günlərdə evə buraxıla bilər".

Əjdər Əliyev deputatın şübhəli şəxs qismində tutulan 4 nəfərdən məlumatlı olduğunu deyib:

"Bəli, bu barədə Fazil Mustafanın məlumatı var. Rəsmi xəbərləri izləyib, onu xəbərdar edirik".

Xatırladaq ki, hadisə martın 28-i saat 21:51 radələrində paytaxtın Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında qeydə alınıb. Belə ki, Milli Məclisinin deputatı Mustafa Fazil Qəzənfər oğluna yaşadığı evin qarşısında “Kalaşnikov” avtomat silahından atəş açılaraq terror aktı törədilib. Nəticədə F.Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilib.

Ötən gün DİN-in mətbuat xidmətindən verilən məlumata görə, Fazil Mustafaya qarşı cinayət hadisəsi ilə əlaqədar Daxili İşlər Nazirliyi, Dövlət Təhlükəsizliyi Xidməti və Baş Prokurorluğun birgə keçirdiyi əməliyyat-axtarış, əməliyyat-istintaq tədbirləri çərçivəsində 4 nəfər müəyyən olunaraq saxlanılıb.