Bakıda ödəmə terminalları niyə tapılmır? - CAVAB

Lent.az-ın “Bir sual bir cavab” rubrikasında növbəti mövzu paytaxtın bəzi ərazilərində “BakıKart'' terminalının mövcud olmaması ilə bağlıdır.

Bakının bəzi ərazilərində “BakıKart” ödəmə terminalı yerləşdirilməyib. İnsanlar dayanacaqlarda kartların balansını artıra bilmirlər. "BakıKart" ödəmə terminalının olmadığı həmin ərazilərin yaxınlığında isə metro stansiyaları da yoxdur.

Maraqlıdır, paytaxtın bəzi ərazilərində “BakıKart'' terminalının olmamasının əsas səbəbi nədir?

Lent.az-a açıqlama verən Bakı Nəqliyyat Agentliyinin mətbuat xidmətinin rəhbəri Mais Ağayev bildirib ki, 2021-ci ilin sentyabrdan başlayaraq sərnişinlərin ''BakıKart''ın balansını daha rahat artıra bilməsi üçün müasir texnologiyalara əsaslanan yeni əlavə imkanlar yaradılıb.

Onun sözlərinə görə, əvvəllər sərnişinlərin istifadəsində avtobus dayanacaq məntəqələrində 197 “MilliÖn” və 50 ədəd ''BakıKart'' terminalı mövcud idi:

“Tətbiq edilən yenilik sayəsində hazırda bütün “MilliÖn” terminalları “BakıKart” ödənişlərini qəbul edir. Birdən-birə sərnişinlərimizin ödəniş etmə imkanları əhəmiyyətli dərəcədə yaxşılaşıb, genişlənib.

Sərnişinlər ''MilliÖn'' terminalları vasitəsilə etdikləri digər ödənişlər kimi “BakıKart” balansını da artıa bilərlər. Nəzərə alsaq ki Bakı şəhərinin inzibati ərazisində 1400 ədəddən çox ''MilliÖn'' var bu artıq sərnişinlərimiz üçün çox böyük rahatlıq deməkdir. Ona görə bir daha sərnişinlərimizə müraciət edərək bildirmək istərdim ki, “BakıKart”ın balansını artırmaq üçün hər hansısa avtobus dayanacaq məntəqəsində aparat axtarmağa zərurət yoxdur. Bütün digər ödənişlər kimi bunu marketlərdə, iaşə obyektlərində olan ''MilliÖn'' terminalları ilə edə bilərlər”.