Azərbaycan Avstriya təcrübəsinin öyrənmək istəyir

Avstriya-Azərbaycan Ticarət Palatasının təşkilatçılığı ilə Bakıda keçirilən Avstriya-Azərbaycan Biznes Forumu çərçivəsində Bakıda səfərdə olan Vyana şəhərinin vitse-meri Renate Braunerin və Avstriyanın ölkəmizdəki səfiri xanım Silvia Mayer-Kaybiçin başçılıq etdiyi nümayəndə heyəti Nəqliyyat Nazirliyində olub.

Lent.az-ın Nəqliyyat Nazirliyinin rəsmi saytına istinadən verdiyi məlumata görə, nümayəndə heyətini Nəqliyyat nazirinin müavini Musa Pənahov qəbul edib. Tərəflər iki ölkə arasında iqtisadiyyatın müxtəlif sahələri, o cümlədən nəqliyyat sahəsində mövcud əməkdaşlığın daha da inkişaf etdirilməsi imkanları, iş adamları arasında əlaqələrin genişləndirilməsinin əhəmiyyəti barədə fikir mübadiləsi aparıblar. Qeyd edilib ki, Azərbaycanda yaradılmış əlverişli biznes və investisiya mühiti xarici investisiyalar üçün olduqca cəlbedicidir. Çıxış edənlər əldə edilmiş nailiyyətlərin Azərbaycanda həyata keçirilən uğurlu iqtisadi siyasətin nəticəsi olduğunu bildirib, avstriyalı iş adamlarını Azərbaycanda yaradılmış əlverişli biznes mühitindən yararlanmağa dəvət ediblər. Söhbət zamanı Vyana və Bakı arasında əlaqələrin son dövrlər genişləndiyi vurğulanıb.

Musa Pənahov xüsusilə son dövrlər həyata keçirilən nəqliyyat layihələri barədə ətraflı məlumat verib və bu çərçivədə Azərbaycan tərəfinin Avstriya təcrübəsinin öyrənilməsində maraqlı olduğunu bildirib. Vyana şəhərinin vitse-meri əlaqələrin daha da genişləndirilməsi məqsədilə Azərbaycan tərəfini Vyanaya səfərə dəvət edib.