Bakıda Dünya Gənclər Şəbəkəsinin regional ofisi açılıb

Bu gün BMT-nin İqtisadi və Sosial Şurasının (ECOSOC) dəstəyi ilə fəaliyyət göstərən Dünya Gənclər Bankı Şəbəkəsinin (WYBN) Türkiyə, İran və MDB ölkələri də daxil olmaqla 14 ölkə üzrə Azərbaycanda regional ofisinin açılış mərasimi olacaq. Lent.az-ın Gənclər və İdman Nazirliyinin rəsmi saytına istinadən məlumatına görə, 2002-ci ildə yaradılan bu təşkilat BMT-nin İqtisadi Komissiyası və Global Compact, Dünya Bankı tərəfindən təsis edilib. Təşkilatın əsas fəaliyyət istiqaməti BMT-nin Minilliyin İnkişaf Məqsədlərinə uyğun olaraq fəaliyyət göstərməsi, gənclər üçün yeni iş yerlərinin açılması və digər proqramları həyata keçirməkdir.

Xatırladaq ki, Azərbaycanda fəaliyyət göstərəcək bankın regional ofisi şəbəkənin sayca altıncı regional ofisi olacaq. Əlavə edək ki, tədbirdə Gənclər və İdman naziri Azad Rəhimov, BMT-nin Azərbaycandakı nümayəndəliyinin rəhbəri Fikrət Akçura, Baş nazirin müavini Əli Həsənov, beynəlxalq qurumların nümayəndələri, səfirlər, millət vəkilləri və vətəndaş cəmiyyətinin üzvləri iştirak edəcəklər.