Magistr imtahanları Lənkəranda da keçiriləcək

2011/2012-ci tədris ili üçün ali təhsil müəssisələrinin magistratura pilləsinə qəbul imtahanları ilk dəfə olaraq Lənkəran şəhərində də keçiriləcək. Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə Lent.az-a bildirib ki, imtahanların birinci mərhələsi fevralın 20-də Bakı, Naxçıvan, Gəncə və Lənkəran şəhərlərində təşkil olunacaq. Onun sözlərinə görə, imtahanlar Bakıda və regionlarda eyni vaxtda – saat 14.00-da başlayacaq.

Xatırladaq ki, imtahanın bu mərhələsində iştirak etmək üçün Sənəd Qəbulu Komissiyasında ərizəsini təsdiq etdirmiş bakalavrlar fevralın 15-dən etibarən internetdə öz elektron ərizəsinə daxil olaraq birinci mərhələ üçün “İmtahana buraxılış vərəqəsi”ni və “Bakalavrın yaddaş kitabçası”nı da çap edə bilərlər. Burada bakalavrlara imtahan prosesi ilə bağlı vacib tövsiyələr, onların əməl etməli olduqları qaydalar və digər zəruri məlumatlar çatdırılır.

Xatırladaq ki, bu il magistraturaya 16510 bakalavr sənəd verib. Qəbul imtahanının birinci mərhələsi fevralın 20-də keçiriləcək.

Elxan SALAHOV