“Perrier” və “Granini” işçilərinin saxta variantları aşkarlanıb

Ölkəyə idxal olunan meyvə şirəsi və mineral suların daxili bazarda saxta variantlarının olması ilə bağlı Standartlaşdırma, Metrologiya və Patent üzrə Dövlət Komitəsinə faktlar daxil olub.

Lent.az-a Dövlət Komitəsindən verilən məlumata görə, Fransa istehsalı olan “Perrier” mineral suları və Avstriya istehsalı olan “Granini” meyvə şirələrinin saxta variantları istehsal olunur, bununla da istehlakçıların hüquqları pozulur. Aşkar olunan saxta sular, əsasən bəzi şadlıq evlərində, restoranlarda vətəndaşlara təklif və təqdim olunur.

Standartlaşdırma, Metrologiya və Patent üzrə Dövlət Komitəsi idxal olunan məhsulların keyfiyyətini və standarta uyğunluğunu araşdıran, bu sahədə dövlət nəzarəti həyata keçirən mərkəzi icra hakimiyyəti orqanı olaraq daxil olmuş faktları araşdırır. Hazırda Komitənin əməkdaşları ölkə ərazisində fəaliyyət göstərən şadlıq sarayları, restoranlarda bununla bağlı monitorinqlər aparır. Monitorinqin nəticələri yaxın günlərdə açıqlanacaqdır.