"Əl-Nəsr"in ulduzu Kriştiano Ronaldonun da daxil olduğu beş investordan ibarət qrupun Səudiyyə Ərəbistanı komandasını Dövlət İnvestisiya Fondundan (PIF) almaq üçün hərəkətə keçdiyi iddia edilib.
Lent.az-ın xarici mediaya istinadən xəbərinə görə, hər bir investorun ən azı 100 milyon dollar investisiya qoymasını tələb edən müqavilənin bir hissəsi olaraq, növbəti 48 saat ərzində mühüm görüşün keçirilməsi planlaşdırılır.
Səudiyyə Ərəbistanı futbolunda tarazlığı dəyişdirə biləcək potensial bir satın alma cəhdi ortaya çıxıb. İddialara görə, "Əl-Nəsr"də oynayan Kriştiano Ronaldo klubun səhmdarlarından biri olmaq üçün investisiya qrupu ilə birləşib.
İdman analitiki Nawaf_STATS tərəfindən verilən və İtaliya mətbuatında da dərc edilən xəbərə görə, beş investordan ibarət qrup Səudiyyə Ərəbistanı Dövlət İnvestisiya Fondundan “Əl-Nəsr” klubunu almaq üçün təklif hazırlayır. Qrupa Kriştiano Ronaldo, RedBird Capital Partners şirkətinin baş direktoru Gerri Kardinale, İbrahim Əl-Muhaydib, Məhəmməd Əl-Xurayci və Şərəf Əl-Həriri daxildir.
Məlumata görə, satınalma təşəbbüsü konsorsiumdakı hər bir investorun ən azı 100 milyon dollar kapital qoymasını nəzərdə tutur. Bunun beş nəfərlik qrupdan ən azı 500 milyon dollar ümumi kapital töhfəsi gətirəcəyi gözlənilir.
Əgər layihə uğurlu olarsa, bu, Kriştiano Ronaldo üçün də diqqətəlayiq bir vəziyyət yaradacaq. Portuqaliyalı ulduz oynadığı "Əl-Nəsr" klubunun tərəfdaşlarından biri olacaq.
Məlumata görə, RedBird Capital və konsorsium nümayəndələrinin növbəti 48 saat ərzində PIF-in yüksək vəzifəli rəhbərləri ilə görüşməsi gözlənilir. Bu görüşlərdən sonra PIF-in “Əl-Nəsr” üzərində nəzarəti investor qrupuna ötürməyə hazır olub-olmadığını aydınlaşdıracağı gözlənilir. Hazırkı mərhələdə satınalmanın başa çatdığını təsdiqləyən rəsmi açıqlama yoxdur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
