Gəncədə beynəlxalq konfrans keçiriləcək

Yeni aqrar təhsil modeli ilə bağlı konfrans 2 gün davam edəcək
Gəncədə mayın 15 və 16 tarixlərində beynəlxalq konfrans keçiriləcək. Azərbaycan Dövlət Aqrar Universitetində təşkil olunacaq konfrans kənd təsərrüfatı mütəxəssislərinin hazırlanması problemləri, müasir vəziyyət, beynəlxalq təcrübə və yeni aqrar təhsil modeli mövzularında təşkil olunacaq. Bu barədə Lent.az-ın Gəncəbasar müxbirinə Universitetin Beynəlxalq Əlaqələr şöbəsinin müdiri Cəfər Məhərrəmov məlumat verib. Onun sözlərinə görə, 2 günlük konfransda ABŞ, Almaniya, Türkiyə, İran, Gürcüstan, Norveç kimi ölkələrin ali təhsil məktəbləri, elmi-tədqiqat institutlarından mütəxəssislər, Azərbaycan Respublikası Kənd Təsərrüfatı, eləcə də Təhsil Nazirliyi nümayəndələrinin iştirakı nəzərdə tutulur.
Konfrans iştirakçıları Azərbaycan Dövlət Aqrar Universitetinin fəaliyyəti, təcrübə sahələri ilə də tanış olacaqlar.
Vüsalə Cənnətova