Sosial yardımların verilməsi gələn ilə qaldı
28 dekabr 2009 18:30 (UTC +04:00)

Sosial yardımların verilməsi gələn ilə qaldı

Elnur Kələntərli: “Yanvarın ortalarında 3-4 ayda yığılıb qalmış vəsaitlərin hamısı hər kəsin hesabına köçürüləcək”

Azərbaycanda kasıb ailələr üçün nəzərdə tutulmuş ünvanlı sosial yardımların ödənilməsi yaxın günlərdə mümkün olmayacaq. Buna səbəb yardım alanlar haqqında məlumat bazasının serverin genişləndirilməsi prosesinin başa çatmamasıdır.

Əmək və Əhalinin Sosial Müdafiəsi Nazirliyinin mətbuat xidmətinin rəhbəri Elnur Kələntərli Lent.az-a bildirib ki, hazırda qurumun mütəxəssisləri serverdəki problemin aradan qaldırılması ilə məşğuldur. Onun sözlərinə görə, texniki problem ən geci yanvarın ilk ongünlüyünədək aradan qaldırılacaq. Yanvarın 15-dən sonra isə bütün bölgələrdə ünvanlı sosial yardımların verilməsi bərpa olunacaq.

Ödənişlərin ləngiməsinin texniki problemlərlə deyil, büdcədə ünvanlı sosial yardım üçün ayrılan vəsaitin xərclənib qurtarması əlaqələndirilməsinə gəlincə, nazirlik rəsmisi bunu təkzib edir. Elnur Kələntərlinin sözlərinə görə, hazırda sosial yardımların ödənməsi üçün lazım olan qədər maliyyə vəsaiti var. Lakin məlumat bazası dağıldığından həmin vəsaitlərin sahiblərinə çatdırılması mümkün deyil.

O ki, qaldı sosial yardımların verilməsinin nə vaxtdan dayandırılmasına, nazirlik rəsmisi bu problemin müxtəlif rayonlarda müxtəlif vaxtlarda ortaya çıxdığını söyləyib. Onun sözlərinə görə, ölkə üzrə bütövlükdə götürsək, sosial yardımların verilməsi sentyabrın ortalarında dayanıb: “Amma yanvarın ortalarında 3-4 ayda yığılıb qalmış vəsaitlərin hamısı hər kəsin hesabına köçürüləcək”.

Elxan SALAHOV
# 438

Oxşar yazılar