BŞBPİ: Milli Şuranın aksiyasında 500 nəfərədək şəxs iştirak edib - YENİLƏNİB

Aprelin 5-də özünü Demokratik Qüvvələrin Milli Şurası adlandıran qurumun Yasamal rayonundakı "Məhsul" stadionunda Bakı Şəhər İcra Hakimiyyəti ilə razılaşdırılmış mitinqi keçirilib.

Bakı Şəhər Baş Polis İdarəsindən (BŞBPİ) APA-ya verilən məlumata görə, saat 15.00-dan 17.00-dək davam edən toplantıda həmin quruma daxil olan ayrı-ayrı partiyaların, bir sıra müxalifətyönümlü qeyri-hökumət təşkilatlarının və bəzi radikal dini qrupların 500 nəfərədək olan üzvü və təəssübkeşi iştirak edib.

BŞBPİ-dən bildirilənə görə, aksiyada ictimai asayişin və hüquq qaydasının kobud şəkildə pozulması hallarına yol verilməyib.

***

Bu gün Yasamal rayonu ərazisindəki keçmiş “Məhsul” stadionunda Milli Şuranın Bakı Şəhər İcra Hakimiyyəti (BŞİH) ilə razılaşdırılmış mitinqi keçirilib.

APA-nın məlumatına görə, aksiyada Milli Şuraya daxil olan qurumlarla yanaşı, digər müxalifyönlü təşkilatların təmsilçiləri də iştirak ediblər.

Mitinqdə Azərbaycan Xalq Cəbhəsi Partiyasının (AXCP) sədri Əli Kərimli, partiyanın Gənclər Komitəsinin sədri İlham Hüseyn, Milli Şuranın sədri Cəmil Həsənli, Milli Şuranın üzvləri Eldəniz Quliyev, Gültəkin Hacıbəyli, Nurəddin Məmmədli, Oqtay Gülalıyev və digərləri çıxış ediblər.

Aksiyada xırda insident də yaşanıb. Belə ki, aksiya iştirakçıları BŞİH-lə razılaşdırılmamış şüarlar səsləndiriblər. Bakı Şəhər Baş Polis İdarəsi əməkdaşlarının mitinq təşkilatçılarına xəbərdarlığından sonra bunun qarşısı alınıb.

Qeyd edək ki, Müsavat Partiyası və digər partiyaların rəhbərləri aksiyaya qatılmayıblar.

***

15:32

Milli Şura Yasamal rayonundakı keçmiş “Məhsul” stadionunda mitinq keçirir.

APA-nın məlumatına görə, mitinq Bakı Şəhər İcra hakimiyyəti ilə razılaşdırılıb.

Aksiyada Müsavat, ADP, KXCP və digər müxalif partiyalar iştirak etmir.