İtaliya Senatında “Azərbaycan-İtaliya əlaqələri” mövzusunda dəyirmi masa keçirilib - FOTO

İyunun 15-də Azərbaycan Respublikasının Milli Məclisinin beynəlxalq münasibətlər və parlamentlərarası əlaqələr komitəsinin sədri, Azərbaycanın Avropa Şurasının Parlament Assambleyasındakı nümayəndə heyətinin rəhbəri Səməd Seyidov və Milli Məclisin Beynəlxalq münasibətlər və parlamentlərarası əlaqələr komitəsinin üzvü, Azərbaycan-İtaliya parlamentlərarası əlaqələr üzrə işçi qrupunun sədri Azər Kərimlinin İtaliya Senatının Avropa İttifaqı siyasəti üzrə daimi komissiyasının sədri, İtaliya-Azərbaycan dostluq qrupunun rəhbəri Rossana Boldinin dəvəti ilə İtaliyaya işgüzar səfəri başlayıb.

Lent.az-ın verdiyi məlumata görə, səfərin ilk günü Azərbaycan nümayəndə heyəti İtaliya Senatının xarici siyasət üzrə daimi komissiyasının sədr müavini senator Alberto Filippi və İtaliya Deputatlar Palatasının xarici siyasət üzrə daimi komissiyasının sədri Stefano Stefani ilə görüşlər keçiib.

Görüşlərdə iki ölkənin parlamentləri arasında əlaqələrin inkişaf perspektivləri barədə fikir mübadiləsi aparılıb. Həmin gün Senatın Avropa İttifaqı siyasəti üzrə daimi komissiyasının təşəbbüsü və Azərbaycanın İtaliyadakı səfirliyinin dəstəyi ilə İtaliya Senatında “Azərbaycan-İtaliya əlaqələri” mövzusunda dəyirmi masa da keçirilib. Tədbirdə İtaliya Senatı və Deputatlar Palatasının üzvləri, habelə İtaliyanın tədqiqat mərkəzləri və mətbuat nümayəndələri də iştirak ediblər. Dəyirmi masaya Səməd Seyidov və Rossana Boldinin sədrlik edib.

Azərbaycanın İtaliyadakı səfiri Vaqif Sadıqovun giriş nitqindən sonra İtaliya Xarici İşlər və İqtisadi İnkişaf Nazirliklərinin, habelə Romada fəaliyyət göstərən Beynəlxalq Münasibətlər İnstitutundan olan məruzəçilər Azərbaycan-İtaliya əlaqələrinin indiki vəziyyəti və perspektivləri haqqında öz fikirlərini dinləyicilərə çatdırıblar. Dəyirmi masa zamanı İtaliya parlament üzvlərinin çox saylı sualları cavablandırılıb.