Nyu-Yorkda Azərbaycan bayrağını ucaltma mərasimi – FOTO

Lent.az-ın məlumatına görə, mərasimdə Azərbaycan Amerika Cəmiyyətinin (AAC) sədri Tomris Azəri çıxış edərək bu günün Azərbaycan tarixindəki önəmindən, azərbaycanlıların qədim köklərə malik dövlətçilik ənənəsindən danışıb. Bildirib ki, 1918-ci il mayın 28-də müsəlman şərqində ilk demokratik, dünyəvi dövlətin əsasını qoyan azərbaycanlılar, regionun digər millətləri üçün nümunəyə çevriliblər.

Türkiyənin Vaşinqtondaki səfiri Namık Tan bu bayramın sadəcə Azərbaycan üçün deyil, eyni zamanda Türkiyə üçün də böyük əhəmiyyət daşıdığını qeyd edib. AXC-nin yaradılmasının bütün türk dünyasının böyük nailiyyəti olduğunu vurğulayıb.

Azərbaycanın BMT yanındakı Daimi Nümayəndəliyinin əməkdaşı Yusif Məhəmmədəliyev tədbir iştirakçılarını və Azərbaycan xalqını bayram münasibəti ilə təbrik edib, AXC-nin zəngin irsindən və əldə etdiyi nailiyyətlərdən söhbət açıb.

AAC-ın icma ilə əlaqələr üzrə direktoru Emin Həsənəv AXC irsinin və Azərbaycanın zəngin dövlətçilik tarixinin bütün gənclər üçün ilham mənbəyi olduğunu deyib və tədbirin keçirilməsi üçün Nyu-Yorkun Bowling Green bağının təsadüfi seçilmədiyini qeyd edib. Bildirib ki, ABŞ-ın müstəqilliyinin əldə edilməsi üçün aparılan mübarizədə bu ərazidə çoxlu amerikalı həlak olub. Azərbaycanın müstəqilliyi də minlərlə azərbaycanlının qanı, canı bahasına başa gəlib. Tədbirin keçirilməsi üçün bu yerin seçilməsi Amerika və Azərbaycan xalqları arasında istiqlaliyyət mübarizəsində oxşarlığın bariz nümunəsidir.

Sonda, Azərbaycanın Dövlət himninin sədaları altında üç rəngli bayrağımız səmaya qaldırılıb.

Tədbir başa çatdıqdan sonra, azərbaycanlılar Türk-Amerikan Assosiasiyaları tərəfindən təşkil olunmuş 29-cu Nyu-York-Türk paradına qatılıblar. Builki paradda avtomobillərdən də istifadə edilib. Maşınlar küçə ilə hərəkət edərkən Azərbaycan musiqisi səsləndirilib və üçrəngli bayrağımız dalğalandırılıb. Azərbaycanlıların maşını “Azərbaycan “Eurovision-2011” musiqi yarışmasının birincisi” plakatları ilə bəzədilib, Eldar və Nigarın “Running Scared” mahnısı səsləndirilib.