İctimai Palata mayın 27-nə sessiya təyin etdi
19 may 2011 19:06 (UTC +04:00)

İctimai Palata mayın 27-nə sessiya təyin etdi

Bu barədə Lent.az-a İP KŞ-nin üzvü Vidadi Mirkamal məlumat verib. O bildirib ki, toplantıda mayın 27-də İctimai Palatanın növbəti sessiyasını çağırmaq barədə qərar qəbul edilib. Daha sonra isə sessiyanın gündəliyi ətrafında müzakirə aparılıb. V.Mirkamal onu da bildirib ki, toplantıda İP KŞ-yə müraciət edən “Vətəndaş forumu”nun təklifi dəyərləndirilib. 8 partiyanın birgə yığıncağının keçirilməsini təklif edən foruma belə cavab verilməsi qərarlaşdırılıb ki, partiyaların kimlərlə görüş keçirməsi öz daxili işləri olduğu üçün İP KŞ bu məsələyə qarışmasın: “Bununla belə, İctimai Palataya hansı partiya üzv olmaq istəyirsə, buna heç bir maneə yoxdur, fərdi qaydada gəlib üzv ola bilərlər”.


İctimai Palatanın növbəti mitinqinin vaxtı ilə bağlı müzakirə aparılmadığını, bu barədə heç bir dəqiqləşdirmə olmadığını qeyd edən V.Mirkamal mitinqlə bağlı qərarı İP-in sessiyasının müzakirəsinə çıxaracaqlarını bəyan edib.


Toplantıda, həmçinin, həbsdə olan şəxslərlə bağlı bəyanat qəbul olunub, mayın 28-də Azərbaycan Demokratik Respublikasının qurulmasının 93 illiyi ilə bağlı Novxanı qəsəbəsində Məmməd Əmin Rəsulzadənin abidəsi önündə tədbir keçirmək qərarlaşdırılıb.

Anar GƏRAYLI
# 554

Oxşar yazılar