Müxalifətçilər arasında “Yessentuki davası” başladı

Bu gün Milli Məclisin iclasında millət vəkili Qüdrət Həsənquliyev Bakıda keçirilən 2 aprel mitinqi ilə bağlı həbs olunanların azadlığa buraxılması üçün çağırış edib: “Həmin gəncləri mitinqə çağıran İctimai Palatanın Koordinasiya Şurasının üzvləri Yessentukidə dincəlirlər. Amma həbsdə olan gənclərin valideynlərinin övladlarının yanına getmək imkanları yoxdur. İnanmıram ki, bundan sonra kimsə İctimai Palatanın çağırışı ilə küçəyə çıxsın”.

Qeyd edək ki, İctimai Palatanın Koordinasiya Şurasının üzvləri Pənah Hüseyn, Rauf Arifoğlu və İkram İsrafil hazırda Yessentuki kurort şəhərindədirlər.

Qüdrət Həsənquliyevin ittihamlarına cavab özünü çox gözlətməyib. “Yeni Müsavat” qəzetinin baş redaktoru qəzetə açıqlamasında Yessentukiyə istirahətə yox, müalicəyə getdiklərini bildirib.
O, Q. Həsənquliyevə bəd bir mesaj da yollayıb: “Həsəd aparanın, yaxud bu halımızdan bizə qarşı istifadə edənin başına gəlsin”.
Baş redaktor deyib ki, hazırda onların olduğu yerdə xeyli iqtidar təmsilçisi, məmurlar və Qüdrət Həsənquluyevin dostları olan deputatlar da var: “Hər gün ən azı 3 dəfə onlarla bir-birimizi görürük, bəziləri ilə ayaqüstü danışırıq da. Hər kəs də bir - birindən müalicəsinin necə getməsini soruşur”.