“Şərq tərəfdaşlığı”na qoşulan ölkələrə 4 milyon avro ayrılıb

Avropa Şurası və Avropa İttifaqı “Şərq tərəfdaşlığı”na daxil olan Azərbaycanda, Ukraynada, Belarusda, Gürcüstanda, Moldovada və Ermənistanda demokratiyanın inkişafı və stabilliyin qorunub saxlanması ilə bağlı layihələrin qarşıdakı 30 ay müddətində həyata keçirilməsi məqsədi ilə ümumilikdə 4 milyon avro ayırıb.

Lent.az AzərTAc-a istinadən xəbər verir ki, Avropa İttifaqının “Şərq tərəfdaşlığı” təşəbbüsü çərçivəsində Avropa Şurası islahat proseslərini AŞ və Aİ standartlarına yaxınlaşdırmaq məqsədi ilə altı ölkədə seçkilərin keçirilməsi, məhkəmə sistemində islahatlar aparılması, kibercinayətkarlığa və korrupsiyaya qarşı mübarizə sahəsində əməkdaşlıq layihələrini həyata keçirəcək.

Avropa Şurasının əməkdaşlıq və siyasi məsləhətləşmə idarəsinin rəhbəri Klaudiya Lyüçiani AŞ-nın Aİ ilə birgə həyata keçirəcəyi bu işi bütünlükdə ümumi Avropa dəyərlərinin inkişafının, habelə iki nüfuzlu qurum arasında sıx əməkdaşlığın bariz nümunəsi kimi qiymətləndirib.