Kocaeli Böyük Şəhər Bələdiyyəsindən Azərbaycana böyük jest

Kocaeli Böyük Şəhər Bələdiyyəsi Azərbaycan Mədəniyyət Mərkəzi üçün dəniz kənarında bina və yer ayırıb. Lent.az-ın verdiyi məlumata görə, bunu Türkiyə Azərbaycan Dərnəkləri Federasiyasının sədri Bilal Dündar söyləyib.

O deyib ki, bu yer Azərbaycan Mədəniyyət Mərkəzinə əvəzsiz verilib, bunun üçün 1 qəpik belə ödənilməyib. Azərbaycan Mədəniyyət Mərkəzinin yerləşdiyi binanın üst mərtəbəsində Kocaelidə oxuyan azərbaycanlı tələbələrin valideynlərinin bura gələrkən qalmaları üçün hər cür şəraiti olan otaqlar da ayrılıb: “Bu yer dəniz kənarında yerləşir, oranı 2 milyon dollara belə almaq mümkün deyil. Bu yerin heç bir məbləğ ödənilmədən ayrılması Azərbaycana sayğının nəticəsidir. Hazırda Azərbaycan Mədəniyyət Mərkəzinin açılışına hazırlıq görülür”.

Bilal Dündar onu da bildirib ki, İzmit Bələdiyyəsinin Türkiyə Azərbaycan Dərnəkləri Federasiyasına ofis qismində ayırdığı 3 mərtəbəli binanı Azərbaycandan gəlib Kocaelidə təhsil alan tələbələr üçün yataqxanaya çevirəcəklər: “Tələbələri kirayə problemindən azad etmək istəyirik”.

Ramiz