Naxçıvan Ali Məhkəməsinin hakimlərini Azərbaycan Prezidenti təyin etməyəcək
12 may 2011 11:05 (UTC +04:00)

Naxçıvan Ali Məhkəməsinin hakimlərini Azərbaycan Prezidenti təyin etməyəcək

Lent.az-ın məlumatına görə, bu, Milli Məclisdə təsdiq olunan Naxçıvan MR Konstitusiyasına dəyişikliklərdə nəzərdə tutulub.

Dəyişikliklərdə göstərilir ki, Naxçıvan MR Ali Məhkəməsinin hakimlərini muxtar respublikanın Ali Məclisinin sədrinin Azərbaycan Prezidentinə verilmiş təklifi və Azərbaycan Prezidentinin təqdimatı ilə Milli Məclis təyin edir. Bundan əvvəlki variantda isə belə idi ki, Muxtar Respublikanın Ali Məhkəməsinin hakimlərini Naxçıvan MR-nın Ali Məclisinin sədrinin təklifi ilə Azərbaycan Prezidenti təyin etməli idi.

Naxçıvan Konstitusiyasına olan digər dəyişikliyə görə isə muxtar respublikada İqtisad Məhkəməsi ləğv olunub. Dəyişikliklərdə göstərilir ki, bundan sonra Naxçıvan MR-da məhkəmə hakimiyyətini muxtar respublikanın Ali Məhkəməsi, ümumi və ixtisaslaşdırılmış məhkəmələri həyata keçirəcəklər.

Qeyd edək ki, dəyişikliklər mayın 6-da Milli Məclisin plenar iclasında təsdiq olunub.

Mübariz Aslanov
# 577

Oxşar yazılar