Macarıstanda “Azərbaycan Günü” keçirilib - FOTO

Azərbaycan Respublikasının Macarıstandakı səfirliyi Heydər Əliyevin anadan olmasının 88-ci ildönümü ilə əlaqədar ölkənin mühüm sənaye mərkəzi sayılan Dyör şəhərində “Azərbaycan Günü” keçirib.

Səfirliyin mətbuat xidmətindən Lent.az-a verilən məlumata görə, bu münasibətlə şəhər Mərkəzi kitabxanasında “Azərbaycan-Odlar Yurdu” adlı sərgi təşkil edilib.

Sərgidə müasir Azərbaycan rəssamlarının əsərləri, ölkəmizin tarixi keçmişini və hazırkı inkişaf yolunu, eləcə də Heydər Əliyevin çoxcəhətli həyat və fəaliyyətini əks etdirən foto-şəkillər, kitab və bukletlər nümayiş etdirilib. İki həftə müddətində Dyör şəhər sakinlərinin ixtiyarına verilən sərgini Azərbaycan Respublikasının Macarıstandakı səfiri Vilayət Quliyev və şəhər merinin müavini Balaş Pobert Şimon açıb. Vilayət Quliyev Heydər Əliyevin Azərbaycanın yeni və ən yeni tarixindəki rolu, ölkənin siyasi və iqtisadi müstəqilliyinin möhkəmləndirilməsi, uğurlu neft strategiyasının işlənib hazırlanması və həyata keçirilməsi, Azərbaycanın Avropa dəyərlərinə və demokratik dünyaya sıx inteqrasiyası sahəsindəki xidmətləri haqqında danışıb.

İştirakçılar üçün təşkil olunan qəbul zamanı Azərbaycan haqqında qısametrajlı sənədli filmlər nümayiş etdirilib. “Azərbaycan Günü” Dyör şəhər meriyasında və Dyör-Mason-Sopron bölgəsinin Ticarət-Sənaye Palatasında keçirilən tədbirlərlə davam etdirilib. Yerli televiziya və mətbuat tədbiri geniş işıqlandırıb.