Bakıda diffamasiya ilə bağlı konfrans keçirilir

Lent.az-ın məlumatına görə, konfransda hökumət, parlament, vətəndaş cəmiyyəti və KİV nümayəndələri ifadə və media azadlığının qorunmasında diffamasiyanın dekriminallaşdırılmasının vacibliyini müzakirə edilir.

Konfransda iştirak edən ATƏT-in Media Azadlığı üzrə nümayəndəsi Dunya Miyatoviç bildirib ki, Azərbaycan hakimiyyətinin diffamasiyanı dekriminallaşdırmaq və bu addımı atmış ATƏT-ə üzv dövlətlər sırasına qoşulmaq təşəbbüsünü yüksək qiymətləndirir.

ATƏT-in Bakı Ofisinin rəhbəri Əli Bilgə Cankorel isə ifadə və media azadlığının ATƏT-in təməl prinsiplərinin özəyini təşkil etdiyini və diffamasiyanın dekriminallaşdırılmasının hər zaman ATƏT-in Bakı ofisinin əsas prioritetlərindən olduğunu qeyd edib. O deyib ki, Azərbaycan Mətbuat Şurasının müvafiq qanunvericilik təşəbbüsünə dəstək verməkdən məmnundurlar.

Konfransda yerli və beynəlxalq mütəxəssislərin çıxışları davam edir.

Qeyd edək ki, ötənlərdə Mətbuat Şurası ATƏT-in Bakı Ofisi ilə birgə diffamasiya qanunu layihəsi hazırlamış və bunu ictimai müzakirəyə təqdim etmişdi.

Anar GƏRAYLI