Ukraynada Heydər Əliyevin anadan olmasının 88-ci ildönümü qeyd edilib -

Lent.az-a verilən məlumata görə, Ukrayna Azərbaycanlı Gənclər Birliyinin və Nikolayev şəhərində fəaliyyət göstərən Heydər Əliyev adına elm və mədəniyyət mərkəzinin təşəbbüsü ilə keçirilən tədbirdə dünya azərbaycanlılarının milli məfkurə ətrafında birləşməsində mərhum prezidentin tarixi xidmətlərindən bəhs olunub.

Nikolayev şəhərində yaşayan bir sıra xalqların diaspora nümayəndələrinin qatıldığı tədbiri Ukrayna Azərbaycanlıları Konqresinin Nikolayev vilayət təşkilatının sədri Ələddin Məhərrəmov və Heydər Əliyev adına elm və mədəniyyət mərkəzinin sədr müavini Yunis Əliyev açaraq Heydər Əliyevin zəngin və şərəfli həyat yolundan söz açıblar. Əsirlər boyu dünyanın müxtəlif ölkələrinə səpələnmiş soydaşlarımızın vahid məfkurə ətrafında birləşməsində Heydər Əliyevin əvəzolunmaz tarixi xidmətlərindən bəhs ediblər.

Ukrayna Azərbaycanlı Gənclər Birliyinin sədri Anar Tahirov, birliyin Nikolayev təşkilatının sədri Xəyyam Dünyamalızadə və digər gənclər bu gün ölkəmizin dünyanın inkişaf etmiş dövlətləri arasında öz layiqli yerini tutmasını Heydər Əliyevin müdrik və uzaqgörən siyasətinin məntiqi nəticəsi kimi dəyərləndiriblər.

Avropa dialoq klubunun prezidenti Artyom Yakovlyev Azərbaycanla Ukraynanın tarixi dostluq əlaqələrinin inkişaf etdirilməsində Heydər Əliyev şəxsiyyətinin müstəsna rol oynadığını bildirib.

Sonra tədbir iştirakçılar üçün Azərbaycan və Ukrayna dövlət televiziyalarının birgə istehsalı olan “İnsanlara bağışlanan ömür” sənədli filmi nümayiş olunub.